Pedre Milenario

Roteiro polo Pedre Milenario
Ruta non sinalizada
Aloxamento: Casa Florinda en Pedre.
Fotomontaxe da Aldea vella de Vichocuntín en: http://www.youtube.com/watch?v=YeypDSmxK8o

Comezo na aldea de Pedre onde visitaremos o conxunto monumental composto pola igrexa parroquial e o camposanto anexo, no seu interior gárdanse dous fragmentos escultóricos que representan a adoración dos Magos un, a crucifixión o outro así como un mecanismo de reloxería magnificamente conservado que data do ano 1880, un pouco máis adiante os eirados comunais Eira Grande e Eira da Palla, conxunto de doce hórreos, continuaremos cara a ponte medieval de Pontapedre, (S. XII ou XIII) escenario do suicidio de Rosiña de Pedre (22/3/1809), a saída viraremos a dereita e polas veigas das Insuas ascenderemos ó Xacente do Coto das Insuas, pedra antropomorfa con tres cruces riscadas posiblemente medievais, pola corredoira continuaremos cara o Serrapio onde ascenderemos a capela de S. Lourenzo do século XVIII a súa beira dous cruceiros unha cruz e un pombal circular.
Pola estrada dirixímonos á aldea vella de Vichocuntín onde ademais das casas veremos restos dun hórreo muíño e pombal de planta cadrada, abandonamos a aldea para cruzar a N-541 e, por un camiño que corre paralelo a estrada, chegar o Vichocuntín novo, cruceiro e peto de ánimas (1905), desandamos e, pola antiga estrada de Ourense (paralelo corre un camiño pero non sempre é transitable) dirixímonos a Pedre, cruzamos de novo a N-541, aquí podemos rematar ou enlazar co segundo tramo da ruta, para iso a esquerda, por unha pasarela por enriba da N-541, chegamos a Aldea de Riba, hórreos e, a chamada Casa da Inquisición (S. XVII) pola pista imos ascendendo cara os petróglifos da Laxa da Filloeiras, un bolo granítico con cinco círculos concéntricos e oito coviñas, a ras do chan, unhas 44 cazoletas de entre 4 e 23 cms. de diámetro, desandamos para, ó chegar á altura do que queda dun campo de fútbol, por unha pista de xabre, baixar a un tramo abandonado da antiga estrada de Ourense, a esquerda, dirixímonos a Ponte do Barco onde un modesto monumento nos recorda que na noite do 13 de agosto de 1936 foron asasinados Francisco Arca e Secundino Bugallo, cruzamos a ponte para visitar as Cortellas de Pedre, poboado medieval que despois de abandonado foi reutilizado para gardar o gando e, onde segundo a tradición, se acubillaba Pepa a Loba e os seus, desandando o camiño regresamos para rematar a andaina en Pedre .