Peñaflor - El Pedrosu - Peñaflor

Na divisoria ente Candamu y Les Regueres, pero siempre en suelu candamín, alcuéntrase la Sierra El Pedrosu. Un monte que, colos sos pinares, pistes anches y área recreativa podría pasar por un monte cualquiera si nun fuera pola historia que guarda. Equí se pueden atopar más de 50 construcciones béliques construides polos republicanos nel so intentu d’aparar l’avance de les tropes golpistes de Franco.


Datos:
Entamu: La Ponte Peñaflor. Podemos llegar en tren FEVE al apeaderu de Peñaflor o pela N-634. Hai sitiu p’aparcar tantu nel Restaurante Casa Aurina como na esplanda d’enfrente, puntu onde arrancamos la ruta.
Final: Circular.
Distancia: 13 km
Tiempu: 3h 20’ en movimientu.
Desnivel: 707m
Altor másimu: 613m
Altor mínimu: 57m
Dificultá: Fácil.
Flora: Pinares, castañales.



Ruta:
Salimos de la esplanada de la yá zarrada Mina Mariqueta, explotación antigua de caolín, pasando la portiella que da pasu a una pista ancha pela que vamos ascender en paralelu al regueru La Vara hasta llegar al también abandonáu y desmanteláu aserraderu. Equí vadeamos el regueru pa xirar al pasalu a la izquierda hasta atopar otru cruce. Tomamos el camín a la derecha (a la izquierda diríemos pa Grullos per Cueru con destín Beifar). Siguimos ganando altura a buen ritmu y meyor ritmu la vamos ganar en cuantu lleguemos al próximu desvíu a la izquierda, nel que vamos tomar la vía directa subiendo per un camín descarnáu en forma de cortafuegos que nos va llevar a La Escrita. Equí facemos el primer exerciciu d’imaxinación, pa treslladanos al 1936 y visualizar la zona n’ausencia d’árboles, acompañaos de les explicaciones sobre la vida nel frente d ellos distintos paneles informativos d’esta primer parada, na que podemos recorrer un cachu trinchera y adentranos nuna casamata.
Retomamos l’ascensión na que vamos alternar tramos a cielu abiertu con tramos a la solombra los pinares mientres alcontramos nuevos emplazamientos d’estructures de defensa militar hasta llegar a la cima del Pedrosu, cima pocu marcada y acompañada a pocos metros del Picu Cimeru, solu 3 metros más baxu. Equí volvemos a visitar estructures como los nieros d’ametralladora antes d’empezar el descenso rodeando la cima pa volver de vuelta pelos nuestros pasos hasta’l PK 8 de la nuestra ruta, onde nos vamos desviar a la izquierda pa siguir el trazáu del descenso de bici, con atención ente posibles ciclistas, onde vamos poder asombranos colos saltos y peraltes que durante 1,5 kilómetros adornen el circuito con final nel cruce a la carretera que sube a Las Ablanosas. Equí viramos a la derecha pa volver a dar al aserraderu y siguir el camín de vuelta, que vamos adornar a puntu d’acabar con una ascensión a la peña que da nome a Peñaflor, garrando un senderín a mano derecha que, zigzaguiante, va recompensanos con una vista mui guapa de la veiga de Grau y que nos va ayudar a comprender la importancia histórica d’esta estrechez natural. Cuando lo consideremos oportunu, refacemos los nuestros pasos y continuamos lo pocu que nos queda de baxada hasta Las Casas xunto a la ponte.
Notes:
- La ponte Peñaflor ye una estrechez natural siendo’l pasu más estrechu del Nalón en munchos kilómetros, funcionando asina como defensa natural ente invasiones.
- La ponte Peñaflor fue escenariu bélicu na guerra del 1808 ente les tropes napoleóniques y les asturianes.
- Nel 36, los dos llaos de Peñaflor fueron escenario bélicu constituyendo un frente de defendsa republicana ente l’avance de les Columnes Gallegues del exercitu franquista, la Sierra El Pedrosu al norte y el Monte los Pinos al sur.
- El monte ofrez munches posibilidaes pal mountainbike, inclusu con opciones pa los más baxadores.