Pista do Marroquí. Toro-Correchouso, Laza

"Mítica" ruta que, sen ter unha especial dificultade, descorre por unhas paraxes moi especiais; un deses percorridos que "hai que facer" polo menos unha vez.
Trátase dunha pista construída na íngreme ladeira esquerda do canón do río Cabras, no concello de Laza. A súa realización veu motivada pola construción do ferrocarril do sur da Galiza (Zamora-A Coruña) e a necesidade de acceder ás bocas dos túneles que furan este montuoso territorio. Nesta páxina hai un texto da mestra de Laza Carmen Rivero Gallego que explica a historia: https://deandar.es/2016/06/19/correchouso-senda-del-marroqui-toro-correchouso/
O percorrido é practicamente de ida e volta, cun pequeno bucle na parte alonxada, na aldea de Correchouso. Ten un perfil bastante chairo aínda que cun apreciable desnivel mais este faise dun xeito paulatino (o dato que aparece nesta ruta non é exacto e vén motivado polas dificultades do GPS nun terreo tan ladeiro).
Comeza na estrada de acceso a Toro. Uns carteis que indican o punto. Hai quen a empeza na propia aldea de Toro, pero considero que non paga a pena facer ese treito de estrada con importante desnivel cando se remate. Iso si, unha visita a esta aldea é moi recomendable (hai un miradoiro natural sobre a ruta e o canón, vertixinoso!) Tamén podería comezarse, loxicamente, na aldea de Correchouso. Parte da pista está alcatroada e o resto é de terra. Hai un derrube preto de Correchouso que, a pé. sálvase ben pero que cadaquén decida por si mesm@. Isto tamén fai que os vehículos non poidan xa transitar por este vial.
Non recomendaría facer esta camiñada en día de mal tempo (porque vai descuberta), nin en tempo moi caloroso (pola exposición á raxeira do sol e polo aire quente que sobe polas ladeiras).
Non é unha ruta sinalizada pero non tén perda posible. Se acaso na aldea de Correchouso pódese ir por unhas ou outras calellas. Porén levala gravado no GPS non vén mal nunca