PR-G 19. Tui - Caldelas - Tui

Este sendeiro levaba tempo desaconsellado pola Federación Galega de Montañismo por problemas de mantemento, agora ven de ser limpo e sinalizado de novo.
Consta de dous treitos ben diferenciados, o que vai a carón do Miño dende Tui a Caldelas e outro que volve dende aquí ao punto de saída en Tui polas parroquias do interior.
O interese do percorrido é tamén dispar, polo río discorre por carreiros con vizosa arboreda de loureiros, castiñeiros e carballos; é moi agradable de facer.
A parte de recorrido dende Caldelas a de Tui polos núcleos de poboación dispersos vai por pistas asfaltadas, mais con certo interese. Semella que son dous percorridos moi mal encolados: o do río por contornas naturais e o do interior por duro firme.
A nosa andaina comeza a carón da ponte internacional e pola beira do Miño pasamos polas instalacións de deportes náuticos, áreas de lecer e a igrexa de San Bertolomeu, onde coincide co Camiño Xacobeo. Seguimos por corredoiras ata acadar a fermosa ponte románica sobor do río Louro. Metémonos por detrás da estación depuradora de augas e chegamos a praia fluvial, e continua o bosque de ribeira. Atravesamos o río Rial e entramos en Caldelas de Tui onde tedes unha área de lecer e cun pequeno desvío podedes ver o seu balneario.
A partir de aquí o asfalto é case sempre o firme do noso camiño e logo de ver uns muíños no río Caselas pasamos por unha carballeira, un piñeiral e polo muíño restaurado de Fuchaco, no río Rial. En Baldráns vemos a igrexa de Santiago e o seguinte núcleo será Páramos. Continuamos para enlazar o noso percorrido co que fixemos na ida, a altura da estación depuradora de Guillarei. Dende aquí desandamos o noso camiño ata o punto de partida na ponte internacional de Tui.