PR-G 210 'Ruta da Casa do Patrón'. Lalín.

A ruta comeza xunto ao museo etnográfico e centro de actividades Casa do Patrón, en Codeseda, Lalín. Este conxunto é unha iniciativa particular e reúne centos de pezas da cultura tradicional e popular galega. Ten actividades para escolares e outros colectivos e persoas e, tamén, un restaurante por encargo. Moi recomendábeis!!
Nos primeiros pasos da camiñada percorremos as rúas da aldea e imos vendo o coidado co que se recuperaron e adecentaron as construcións, así como cartaces informativos. Dirixímonos a seguir cara a castro de Doade e, antes de chegar tamén podemos observar os restos moi arrasados dunha mámoa, a do Agro do Castro.
O Castro foi parcialmente escavado e apareceron interesantes restos: foxos, muralla, edificacións (casa e posíbeis alboios), cerámica, bronces, restos líticos... Hai cartaces informativos que ilustran sobre o lugar e as prospeccións.
Unha vez de volta, dirixímonos cara o río Asneiro por entre unha boa carballeira. Atopamos un par de fontes (sen tratar).
Logo de pasar o río, sóbese cara o Coto do Presigueiros, atravesando sobre a vía do tren antiga e por baixo da do AVE. Xusto antes de chegar á ponte sobre a vía, hai un punto PERIGOSO: unha capa de cemento no camiño pero que está oca por abaixo, debido a corremento da terra. Está cortado o paso de vehículos cun valo pero non hai cartaz que informe do motivo. Se se pasa cara a parte da vía, non parece haber perigo.
O seguinte punto de especial interese é a igrexa de San Xoán de Vilanova. Igrexa de orixe románica, reformada no s. XVIII. Conserva da época románica a fachada, de pedras moi irregulares, e os muros laterais. Ten tamén algúns canzorros, moi erosionados, e no interior o escudo do XXI Conde de Lemos. Non moi lonxe, hai unha edificación de indianos, posibelmente unha escola e un cruceiro.
Continúa o camiño, atravesando Vilanova e seguindo cara o Castro de Vilanova, este sen escavar.
Agora toca descender ata o nivel do Asneiro, atravesando polo camiño a aldea de San Tomé. Aquí hai un pazo bastante ben conservado aínda que non se lle ven elementos espectaculares, quitando a cheminea. Xunto ao río podemos ir ver un carballo de gran porte e parece que excelente saúde.
Nova costa arriba, pasando pola aldea de Carracedo e baixando de novo para atravesar o río Lebozán. Máis adiante, onde se xuntan o Lebozán verte a súa auga non Asneiro, hai unha xeitosa área de lecer ben acondicionada con grella en caseto cuberto e diversas mesas.
Xa só queda camiñar uns dous quilómetros ata o final da ruta, pasando por outra área de lecer, a dos Muíños.
A mor parte da ruta descorre por entre frondosas carballeiras. Son escasos e breves os treitos de pavimento duro. Os camiños están limpos e está ben sinalizada. É recomendábel, porén, deixarse guiar polo GPS, por se os descoidos... As subidas e baixadas son bastante levadeiras e o desnivel total xa se ve que non é excesivo. Todo depende das condicións de cada persoa, claro!
Ruta entretida, agradable, e accesíbel. Recomendábel!