PR-G 35 O RÍO DOS DOUS NOMES

🌳 Hoxe encantaríanos falar dunha ruta de sendeirismo preciosa, e o certo é que o é, pero a pesar de estar homologada, está moi mal coidada, e os camiños son confusos, perigosos, e moitos están cheos de silveiras e fentos. Aínda así, conseguimos pasar rematando con feridas e arañazos nas pernas.

A ruta empeza nun lugar moi bonito, como é o merendeiro de Ois. O PR-G 35 chámase "O río dos dous nomes" porque transcorre seguindo o Río Vexo, ou tamén chamado Río Fervenzas, na vertente do Río Mandeo.

Empezamos visitando varios muíños abandonados, que algúns servían como casas nos pisos de arriba. É moi importante non pasar porque están en moi mal estado e podemos caer. A partir de aquí, chegamos a unha ponte que NON deberemos cruzar, senon baixar ata o muíño de abaixo e seguir por un camiño cheo de silveiras que non dura moito, pero é complicado non levarse algún rasguño.

Pouco despóis chegaremos a un camiño máis amplo, onde nos atoparemos un cartel para baixar ao miradoiro do Río. É IMPORTANTE NON BAIXAR, xa que ese cartel é da ruta antiga e foi un pouco modificada, e baixaremos polo outro lado da ruta. Agora baixaremos cara a fábrica de luz, que aproveita a forza da auga para xerar luz aos veciños e, a partir de aquí, subiremos por un camiño empinado ata atoparnos con un cartel que tamén pon "Fábrica de luz", que en verdade é a presa onde se retén a auga. Aquí deberemos baixar por un camiño de terra prácticamente vertical (coidado que esbara e é bastante perigoso), cruzar a presa, e dar media volta para subir polo mesmo sitio e seguir o camiño cara a esquerda. Entre sendeiros complicados, chegaremos agora ao miradoiro do río, que é unha ponte sobre o Río Vexo no que se miramos cara abaixo veremos unha bonita serie de fervenzas impresionantes. Pouco despóis, chegaremos, entre muíños, á ponte que non había que cruzar e, que esta vez, tampouco cruzaremos.
Continuando recto, colleremos "un camiño" á dereita, para subir, prácticamente en vertical ata outro sendeiro que nos levará ata a estrada. Polo asfalto pasaremos por Ponte Xora e chegaremos de novo ao inicio.

En canto ao estado da ruta, xa falamos co Concello de Coirós con resposta positiva.