PR-G 45 VISTAS DE CABANAS

📌 Antes de rematar setembro fixemos outra ruta de sendeirismo.

Trátase do PR-G 45 (non é que saltáramos rutas de golpe, é que as 40, 41, 42, 43 e 44 non existen).

Comezamos no aparcamento do Concello de Cabanas, e subimos todo pola parroquia de Irís ata o Marco do Salto, monumento no que se xuntan as parroquias de Irís, Fuxacos e Santa Cruz do Salto, pasando pola pintoresca aldea da Pedra do Couto.

Alí xiraremos á dereita para subir ata o Pico Castro, punto máis elevado da ruta onde poderemos observar toda a parte baixa de Cabanas e a Ría de Ares.
Daremos media volta e baixaremos, esta vez polo lado dereito outra vez cara a aldea da Pedra do Couto. Neste camiño poderemos observar o Río Eume e un pouquiño das Fragas do Eume.

No parque da Pedra do Couto, tomaremos o camiño da esquerda ata baixar de novo ata Cabanas, pero non remataremos a ruta, xa que non é circular. Na igrexa de Santo André de Cabanas, seguiremos baixando ata a parte baixa de este municipio, pasando por zonas urbanas.

Chegaremos á praia da Madalena, inmenso areal que fai de tope da Ría de Ares e de desembocadura do Río Eume.

Seguiremos cara diante polo camiño da praia ata o fin desta, onde na preamar, se ésta é moi alta, teremos que mollarnos ata alcanzar as escaleiras para subir ata a zona de acantilados.

Nesta bonita zona da costa, poderemos achegarnos con coidado aos pequenos acantilados para fotografíar belas paisaxes da Ría de Ares, Pontedeume e a Praia da Madalena.

Seguindo todo cara diante, remataremos a ruta no antigo Muíño de Mareas da Praia de Río Castro, peculiar praia por estar feita de cunchas de ostras enteiras.

Aquí poderemos darnos un baño para refrescarnos, depende da época no que fagamos a camiñata.