Quintela á Pica ('pedra cabaleira'). Entrimo

Ruta na Baixa Limia, xa case na fronteira con Portugal. Fermosas paisaxes e impresionantes moles de granito. Feita seguindo esta: https://gl.wikiloc.com/rutas-sendeirismo/quintela-a-pica-pedra-cabaleira-34171648
O percorrido comeza a carón da aldeíña de Quitela, no concello de Entrimo. Na entrada, hai unha pequena área de lecer con bancos e fonte de auga (funciona), e lugar onde estacionar. Moi preto comeza a subida por pistas ata o noso obxectivo principal: a pedra cabaleira da Pica. Mais polo camiño podemos gozar de grandiosas vistas e das curiosas formas que os penedos adoptan. A vexetación, nesta altura, está moi fermosa coas carpazas, uces e carqueixas en plena floración.
O punto máis alto da ruta é, precisamente, a área onde está a pedra A Pica. Esta composición de penedos en sorprendente equilibrio é impresionante Nos arredores outra área de lecer (tamaño romaría; para que...?) onde a fonte non ten auga. Mágoa porque é bonita e todo.
O descenso polo lado da Corga do Medio é xa unha tortura porque o monte (toxos) está medrado e o camiño totalmente escavancado pola auga. Engádese, ademais os piñeiros que caeron logo de arder vai uns anos. Na zona baixa, ademais dos toxos hai silveirais que fan case imposible o tránsito. Cada ano que pase será peor, pero xa neste momento NON É RECOMENDABLE ESTE CAMIÑO. A baixada habería que facela polo camiño de ida e, se acaso, buscar algunha das pistas para facela circular en parte.
Na zona baixa volve haber pistas polas que retornamos ao punto de inicio.
A ruta, como se ve no perfil, presenta bastante desnivel aínda que non ten repetidas subidas e baixadas (dentes de serra). No sería apta para persoas sen preparación nin forma física apropiadas.
Todo o percorrido está bastante exposto, polo que non é indicado para días de moito sol e calor ou de mal tempo. As mellores épocas primavera e outono, polas cores da vexetación.