San Esteban - Muros

D'estación a estación de tren pela senda costera. Travesía usando'l tren pa volver o con coches na salida y llegada

Fallu GPS al principiu, son como 9 km en total en verdá

Asturies cuenta con unos 350 km de costa, y gran parte d’ellos podemos recorrelos peles sendes costeres que, d’oriente a occidente, crucen el norte del país. Nesti casu vamos recorrer la ruta ente San Esteban y Muros, una travesía na que podemos usar la llinia de FEVE pa volver a la salida o tener dos coches unu en cada sitiu, puestu que tan bastante cerca pela carretera. En San Esteban, na desembocadura del Nalón, vamos apreciar los restos del so pasáu industrial, como gran puertu del que salía’l carbón que venía, en tren, de les distintes cuenques mineres.


Datos:
Entamu: San Esteban. Estación de tren FEVE. Autovía A-8 salida Muros -San Esteban y N-632 a San Esteban.
Final: Muros. Estación de tren FEVE.
Distancia: 9 km
Tiempu: 2h 15’ en movimientu.
Desnivel: 462m+, 334m-
Altor másimu: 139m
Altor mínimu: nivel del mar.
Dificultá: Fácil.
Flora: Ocalitos, castañales.




Ruta:
Salimos de la estación de San Esteban y podemos apreciar el pasáu industrial del pueblu. Avanzamos pel paséu sobre'l trazáu antiguu del tren que venía con carbón de la Cuenca Minera hasta llegar a les tolves. Ehí se subía'l carbón con cintes tresportadores pa tenelo almacenáu hasta que se descargaba, peles ramples, nos barcos pa la so esportación.
Siguimos xunto a la ría hasta la desembocadura del Nalón, sobre un terrenu ganáu al mar pa usos portuarios.
Dende la desembocadura, al este, vemos L'Arena, la playa de Los Quebrantos (con arena oscura de carbón y restos del material que traen les riaes), el sablón de Bayas (la sablera más llarga d'Asturies), el cabu Vidrias y la islla o peña La Deva (la islla más grande d'Asturies, espaciu natural protexíu).
En dirección oeste, arrodiaos de piscines naturales y artificiales d'agua salao garramos les escaleres que nos van facer subir hasta la ermita del Espíritu Santu, unos 400 pasos que nos faen ganar altura en pocu tiempu.
Con buen firme, que combina formigón con lloses de piedra, avanzamos en constante subebaxa siguiendo’l camín perfectamente marcáu a pesar de les numberoses salides y incorporaciones a carreteres llocales posibles. El mirador de l’Atalaya (112m) ábrenos la mirada a la playa Cazonera y los islotes d’El Paso. Antes de llegar al mirador del Altu Las Llanas desviámonos a la derecha pa dar col Mirador de Los Glayos (72m) onde un conveniente panel informativu pa señalanos tolos accidentes xeográficos que podemos atisbar. Otra vez na senda, nel Altu Las Llanas (111m) podemos aprovechar los bancos y meses del área recreativa pa un descansu.
Siguiendo la ruta, a mano derecha vamos ver la playa de Sanxún, onde puede que podamos ver los rastros del naufraxu d’un barcu pixuetu, de Cuideiru. Ensiguida vamos atopar un desvíu a la derecha, que podemos tomar pa desvianos unos metros y pisar un terrenu diferente pela Punta’l Campón. Ellí tan los restos del Castru d’EL Campón, poblamientu astur de la edá de fierro. Dende equí queda yá pocu camín, descendemos contra Aguilar asomándonos primero na sablera de Xilo o de Veneiro. Ente Xilo y Aguilar ta’l yacimientu medieval d’El Castiellu. Cuenta la lleenda que nunca cueva baxo esta peña habitaba una xana. Al fondu vemos una roca afuracada, El Reló, y asomando nel agua la Peña Seis, colos sos seis salientes.
Abandonamos el trazáu costeru pa subir pa Muros per un camín al final del aparcamiento. Per El Toral vamos dar al barriu d’EL Grabiel onde vamos garrar la carretera a mano derecha y siguila hasta dar cola estación de tren de Muros.
Notes:
- El GPS chifló al entamu la ruta, nun hai que cruzar la ría!
- Otres sendes costeres cercanes son, al otru llau de la ría de L’Arena a Arnao (17,4km), y nel Cabu Peñes la que va dende’l Faru d’Aviles a Lluanco (35km)
- El pisu de la ruta ye fácil, pero hai sitios onde puede tar nidiu. Abrígate nos miradores.
- La playa Xilo toma’l so nome del macabru crimen qu’acabó cola vida de Xilo, un vecín de Muros. Nel añu 1913 alguien acabo cola vida de Xilo, de 74 años, y el so cuerpo per un llau y les piernes per otru apaecieron nuna cueva de la playa Veneiro. La cabeza nunca apaeció y fueron dellos los sospechosos del crimen, nunca resueltu. Como nun intentu de que dalgún día se faiga xusticia, los vecinos rebautizaron la playa col so nome, que nunca se va escaecer.