Senda del Conde Cuaya

Mui cerca dela villa de Grau, esta ruta ofrez una escusa histórica pa disfrutar de los bosques de ribera nuna ruta agradecida pel veranu polo fresco y sombrío y pal añu enteru si disfrutamos col barru.
Primero d’empezar cola reseña histórica, o a la hora de buscar información, convién tener claro y nun confundir al protagonista d’esta ruta, Gonzalo Pelaez de Cuaya “El Sanguinariu” col Conde Gonzalo Pelaez “El Rebelde” que anteriormente, nel sieglu XII, se rebelara hasta tres veces contra’l Reinu de Lleón intentando caltener la independencia del so poder sobre Asturies, acabando desterráu en Portugal. El que nos ocupa, quedó siendo conocíu como Conde de Cuaya ensin tener título nobiliariu, caballeru y bandidu nacíu en Grau vivió ente los sieglos XIII y XIV, na crisis de la Edá Media y foi famosu polos sos asaltos, robos y violaciones en conveniu col Obiespu d’Uviéu, siendo derrotáu pola xunión de los pueblos de Grau y Uviéu con apoyu del rei Alfonso XI de Castiella, acabando los sos díes en Navarra.

Asina, esta ruta sigue los pasos que recorría el Conde, y los suyos, cuando después d’atacar la villa de Grau marchaba a refuxase nel so castiellu de Cuaya.

Datos:
Entamu: Alcubiella. En Grau, garramos la AS-311 dirección a Cubia y los Puertos del Maravio pa nunos 2km llegar al aparcamiento del Restaurante El Tiro.
Final: Ida y vuelta.
Distancia: 10 km
Tiempu: 2h en movimientu.
Desnivel: 148m
Altor másimu: 165m
Altor mínimu: 74m
Dificultá: Fácil. Terrenu húmedu.
Flora: Bosque de ribera. Humeros, sauces, fresnos, ablanos.
Ruta:
Xunto al aparcamientu tenemos el panel esplicativu dela ruta completa que sube hasta San Adrianu y Baselgas, esta vez vamos dir solo hasta Cuaya. Tomamos el camín asfaltáu hasta la salida’l pueblu onde ensin perdida prosiguimos per una caleya ancha. La ruta trescurre paralela al ríu Las Varas, cruzándolu a través d’una ponte cuando llevamos 1,5km, teniendo la posibilidá de vadealu. Durante unos 400m atravesamos una finca na que seguimos ensin problema’l camín na mesma dirección mientres observamos na parte baxo una plantación de mazanales. Volvemos al camín y seguimos atravesando ensin pérdida zones con mayor o menor humedá pa salir nuevamente a otra finca nel kilómetru 3,6 que nos va dar a la carretera GR-2 que vien de Reconcu a Cuaya. Nesti puntu podemos ver una zona d’escalada.
Disfrutamos de les vistes mientres seguimos pela llarga recta de carretera que nos lleva a Cuaya, per un valle abiertu con praos segaos y pumaraes. Ellí, detrás de la ilesia cuenten que taba’l castiellu del Conde Cuaya, que según la lleenda mandó desviar el cursu del ríu p’asentar ellí la so fortificación y de la cual nun queda rastru nengún…más que na toponimia, pues la finca llámase El Torreón. Volvemos pel mesmu camín p’acabar el paséu.


Notes:
- La ruta, PR-AS 101, continúa después de Cuaya ganando altitú pa facer una circular pasando pelos pueblos abandonaos de La Condesa y San Adrianu (PK 11,6) y baxar per Baselgas (PK 16,3) pa un total de 26 kilómetros.
- Escalada. La zona d’escalada de Cuainxú ta dividida en dos sectores con plaques y sectores escepcionales, con víes tanto pa inicación como de mayor dificultá con plaques desplomaes y columnes
- A los 2 km de la ruta podemos desvianos a la Carretera de Los Rojos, vía proyectada como comunicación pola defensa republicana ente l’avance de les tropes fascistes contra’l pasiellu de Grau en Peñaflor pa comunicar con Trubia y Uviéu.
- Si alcontramos portielles pel camín, dexámosles como les topamos, abiertes o zarraes pa facilitar o torgar el pasu del ganáu.