Senda do río Almofrei

Ruta realizada no mes de maio, xa sen un caudal excesivo no río e co intención de non termos problemas para cruzar o río polos pasos de Portamuíños. No mes de xaneiro do ano anterior os pasos practicamente nin se vían, totalmente somerxidos na auga, feito que nos obrigou a improvisar e ir avanzando pola mesma beira do río até que nos sorprendeu a fermosura dos saltos da zona das Fervenzas co tremendo caudal co que baixaba o Almofrei (ver variante: https://gl.wikiloc.com/rutas-sendeirismo/variante-senda-rio-almofrei-portamuinos-cos-pasos-desbordados-de-auga-50785253).

Comezamos a andaina en Ponte Bora (Concello de Pontevedra), perto da estación de ITV, pouco antes de que o Almofrei chegue ao Lérez (é o seu principal afluente), onda o desvío da N-541 (Pontevedra-Ourense) cara a Marcón (PO-542). Os restos dun panel informativo sinalan o inicio da ruta. Dous quilómetros á beira do río lévannos até os pasos de Portamuíños: se no primeiro intento estaban cubertos de auga, impracticábeis, e mesmo tardamos en dar con eles, desta vez eran ben visíbeis, pero a corrente levara por diante un par de pasos, co que nos vimos obrigados a descalzarnos e remangar os pantalóns para pasar á outra beira. Contando con esa continxencia, levamos toallas e escollemos un día de temperatura agradábel.

En pouco tempo imos pasando polas Leiras de Abaixo, a ponte das Leiras, As Leiras... o lugar de Ameixales (xa no km 4 da ruta) coa fonte da Canliña á saída da aldea. No km 5,5 da ruta podedes ver que nos desviamos para dirixirnos a unha zona elevada na que se supón que dariamos cun bo miradoiro, mais as vistas están cegadas polas árbores e o miradoiro que puidese haber en tempos xa non debe ser tal, así podemos evitar ese desvío e aforrar uns 800 metros.

Despois de termos atravesado algunha zona de bosque interesante, achegámonos as partes máis espectaculares da andaina, xa na zona das Fervenzas: diversos saltos no Almofrei refréscannos a vista. Aquí o río marca a división entre Bora e Almofrei, ou o que é o mesmo neste caso, entre Pontevedra e Cotobade agora (Cerdedo-Cotobade). Entre as dúas zonas de saltos ás que nos asomamos, o muíño das Fervenzas. Na segunda zona de saltos hai colocada unha corda de seguridade que nos permite movernos máis doadamente onda o maior dos saltos, que forma unha gran poza mesmo na curva do río.

O regreso realizámolo á beira do río, pola marxe esquerda (dous quilómetros ben chulos con bastante vexetación) até os pasos de Portamuíños e outros dous ao inicio da ruta), cunha breve parada no muíño da Bouza.