Sendeiro Azul do río Verdugo

Din os paneis informativos deste roteiro:

"O concello de Ponte Caldelas é o primeiro de Galicia en ter unha Bandeira Azul nunha praia fluvial e un Sendeiro Azul que pon en valor o territorio fluvial que percorre o río Verdugo.

Os Sendeiros Azuis concebironse como recursos útiles para fomentar o uso e a xestión sostible do medio litoral ou fluvial e o seu ambiente, mediante a cooperación e retroalimentación entre o sector turístico e o ambiental. O obxectivo que se persegue con isto é a consolidación do distintivo de calidade "Sendeiro Azul" como un galardón que se recoñeza e valore na mesma medida que a Bandeira Azul para as praias.

O itinerario polo Sendeiro Azul é o seguinte:

1.- Balneario (inicio do sendeiro). O sendeiro comeza cun tramo urbano accesible para persoas con dificultade de mobilidade ou visuais que nos permite gozar dun agradable paseo pola marxe do río Verdugo, ata chegar á praia fluvial onde poderemos tomar un refrescante baño. (Este balneario desapareceu por mor de un incendio no ano 1910).

2.-Praia fluvial d´A Calzada. Partindo da praia camiñaremos por un bosque en galería formado por salgueiros, ameneiros, freixos, carballos, loureiros, fentos, etc. que flanquean o curso do río Verdugo (ou Verduxo).

3.- Desvío da volta do Cornello. Debido a imposibilidade de continuar pola marxe do río, ascenderemos por una pequena ladeira onde nos atoparemos cunha zona de matogueira típica galega (queirugas, xestas, carqueixas, carpazas, toxos, etc.) e outra de cultivo forestal de eucalipto.

4.- Corredoria da Sorreira. Trátase dun camino tradicional coñecido como "corredoira" que, neste caso, se enmarca entre muros de pedra cubertos de musgo a sombra dunha carballeira acompañada de interesantes fentos. Tras camiñar 300 metros chegaremos a unha bifurcación onde poderemos escoller entre desviarnos cara ao río ou continuar polo sentido natural do camiño.

5.- Pasos de Portasouto e da Larpea. Estos pasos axudarannos a cruzar o río e son unhas grandes pedras case somerxidas na canle do Verdugo (coincide neste punto coa Ruta das Almiñas).

6.- Pasos de Porta de Abaixo. Trátase dun treito parcialmente inundable. Nas beiras atoparemos un bosque en galería formado por carballos, ameneiros, freixos, pradairos, etc., que flanquean o curso fluvial."

De aquí retomamos o percorrido de regreso pola volta do Cornello que nos leva a praia d´A Calzada e deseguido ao punto de comezo.