Sendeiro circular en Coles

Este sendeiro está case todo sinalizado, agás o treito final que vai desde Belesar de Barra de Miño (non o do encoro) ata Meriz. Tendo un pouco de sentido da orientación pódese facer sen o track do GPS, aínda que aconsello seu uso para dito segmento.
Iniciamos o percorrido na aldea de Meriz, seguindo as marcas brancas e azuis de sendeiro local e as brancas e amarelas de sendeiro de curto percorrido, xa que aquí coinciden os dous. Logo de pasar a igrexa de Meriz e o cruceiro, metémonos por un camiño que nos leva a unha frondosa fraga as beiras do rego Lusín e con dous muíños restaurados.
Deixamos atrás unha gran pedra cabaleira e outros dous muíños a antes de acadar unhas casas, imos por unha corredoira a man esquerda. Camiñamos sobre un muro que fai as veces de sendeiro e pasando unha casa en Seoane, a uns cen metros, baixamos por unha congostra que nos mergulla nun tupido bosque.
Agora hai que ir moi atentos para ver un sinal que nos indica que baixemos a esquerda por un carreiro moi pouco definido e que nos mete no corazón da fraga (se continuásemos rectos polo camiño chegaríamos a Prado, con súa igrexa románica de San Xulián de Rivela).
Imos pola ribeira do rego Lusín, por unha fraga abraiante e acompañados do rumor das augas. Impresionante.
Nos espera a aldea de Outeiro e logo de pasala, baixamos a esquerda seguindo as marcas do sendeiro de longo percorrido que vai desde Ourense ata Os Peares, para poñernos no clube náutico de Rivela, no río Miño e cunha contorna de gran beleza. Saímos desta zona pola pista asfaltada da dereita e a uns cento cincuenta metros pola estrada, collemos a man dereita unha corredoira entre árbores. Pasamos por outra fermosa enseada do río Miño.
Seguindo os sinais, entre congostras, muros e arboredas, deixamos atrás Casanova e Levices para chegar a Belesar de Barra de Miño. Fermosísimo treito.
En Belesar abandonamos as marcas dos sendeiros (que nos levarían a Barra de Miño) e subimos a esquerda a estrada para chegar nuns douscentos metros ao núcleo de Cruceiros.
Ide atentos porque xa non hai sinais de sendeiro. Pasamos un bar e unha construción ameada; deixamos atrás o desvío a Barra de Miño e desde este cruce, a uns douscentos metros, a esquerda, subimos por un camiño que primeiro está asfaltado e logo é de terra. Seguimos de fronte e chegamos a Paradela e desde aquí a Meriz, noso punto de comezo e remate.