Sendeiro da Freixa (Variante do PR-G 24)

Este sendeiro perdeu a homologación da Federación Galega de Montaña por problemas de mantenemento pero segue sendo realizable. Por mor da construcción dunha minicentral eléctrica no río Xesta, algún treito do antigo PR-G 24 non é doado facelo e o paso pola zona da levada ten puntos perigosos polo que propoño unha pequena variante pola traza da tubaxe da minicentral e que vai paralela a levada por unha cota un pouco superior.
Saímos da aldea de Liñares e, logo de ver o seu peto de ánimas, baixamos cara ao río Xesta, que atravesamos por unha antiga ponte dun só arco e de gran beleza. Por o Camiño Real, con a vexetación crecida de máis en zonas, pasamos o rego de Fonte Fragoso, para chegar a Cortegada, con outro peto. Aquí metemónos a dereita buscando as carballeiras e fragas que medran arredor do río Xesta e ao chegar a estrada, cruzamos a ponte e comezamos o camiño de retorno pola outra aba do val.
Logo de pasar por Paradela, con súa ermida da Anunciación e muíños, facemos o desvío da antiga ruta homologada. Saíndo desta aldea e pasando a fonte, a uns cen metros atoparemónos a man dereita coa sinal do antigo PR que nos metería nunha corredoira cortada por un valo e logo tamén pola tubaxe da minicentral. Nos seguimos de fronte polo camiño da aldea e a uns setenta metros, na curva, subimos cara ao monte a man dereita, para chegar aos condutos da central hidroeléctrica, indo por carreiros feitos polo gando.
Subido este pequeno treito un pouco incómodo, xa estamos paralelos a levada por onde discurría o sendeiro orixinal e con vistas ao val do río Xesta. Seguimos andando para ver ao fondo do val a espectacular fervenza de Liñares. Temos a opción de baixar ata acadar o seu pé por unha forte pendente que baixamos amodo para non esvarar. Logo subimos de novo ata a canle que seguiremos para achegarnos a outro punto intermedio da fervenza, onde hai unha gran poza con rochas arredor moldeadas pola forza da auga.
Seguimos logo para a contorna da represa da central para ver o fermoso leito do río e volvemos para atrás para seguir por unha corredoira a man dereita que nos levará ata Liñares, o noso punto de partida.