Sendeiro do río da Chanca ata Armenteira (Meaño, Meis)

Este percorrido segue o curso do río da Chanca, desde a ponte de Lores (Meaño) ata o seu nacedeiro, punto no que remata o ruta de sendeirismo sinalizada; pero nos proseguiremos para acadar o mosteiro de Armenteira (Meis). Os que non usedes GPS non teredes ningún problema para facer o sendeiro do río xa que trátase de ir sempre a súa beira.
Comezamos na ponte de Lores, onde hai un aparcadoiro e vemos o muíño da Ponte, o da Igrexa e o de Daniel o Ferreiro, que conta cunha taberna nunha zona moi fermosa e con posibilidade de baño. Os muíños ao longo do río serán 23, con distinto grado de conservación. Seguen o muíño do Crego e o de Malatos e entre bosque de ribeira e leiras atopámonos con outros dous muíños e logo co de Senra.
Máis muíños entre viñedos e hortas e chegamos a ponte de Axis, onde remataba antigamente esta ruta e que agora continúa pasando por unha casa rural, o cemiterio e, logo de cruzar a estrada, mergullámonos nun frondoso bosque de galería con castiñeiros, ameneiros e salgueiros.
O rego a cada paso que damos vaise minguando e chegamos ao seu nacedeiro. Uns metros máis adiante, ao chegar a estrada de Valboa, remata a ruta oficial (pola estrada o mosteiro de Armenteira queda a uns dous quilómetros).
Facemos agora uso do noso GPS e imos por pistas e camiños entre piñeiros para acadar a aba do monte que da sobre a ría de Pontevedra. As vistas son abraiantes, temos a ría aos nosos pés e vemos montes e terras de Pontevedra, a capital, Poio, Marín, a illa de Tambo e ao lonxe os montes da ría de Vigo.
Espéranos para un descansiño a área de lecer de O Castro, por riba de Poio e que ten mesas entre pinos, carballos e castiñeiros e fontes para nos refrescar.
Toca pasar a outra ladeira do monte, pasando preto do campo de golf e logo da cumieira baixamos cara a aldea de Caponiñas e rematamos no mosteiro de Armenteira, en Meis.