Sendeiro do río Tea (Mondariz)

Este sendeiro polas marxes do río Tea, incluido nos lugares protexidos na Rede Natura 2000, percorre o treito que vai desde a desembocadura do seu afluente o rio Refusio ou río de Coveliño (na estrema de Mondariz co concello de Covelo, preto de Barciademera) ata a praia fluvial de Mondariz Balneario.
Será unha doada e fermosa camiñata case sempre baixo unha arboreda de bosque de galería con amieiros, salgueiros, abeleiras, bidueiros e carballos e a carón dunhas augas cristalinas.
O sendeiro segue sempre o curso do río con algún cambio de marxe: comezamos andando pola beira esquerda do río Refusio e a uns oitenta metros, logo de pasar dous muiños en ruínas, xa nos atopamos co Tea. Atravesamos un bosque de abeleiras e vadeamos o río Lougariño e ao chegar aos antigas poldras ou pasos de Tatín, pasamos ao lado dereito do río.
O río serpentea en algún meandro e forma pequenas praias e logo do rego Furafolla, deixamos atrás un canaval para chegarmos ata a ponte de Cernadela, con seus cinco arcos oxivais e que é de orixe romana e reformada nos séculos XV, XVII e XVIII. A seu carón hai unha boa praia, un área de lecer e un muiño.
Continuamos pola marxe dereita; pasamos a ponte da carretera PO-252 e nos poñemos noutra agradable área de lecer: a de Riofrio ou do Val, preto de Mondariz.
Sequimos ata chegarmos ao pontillón de A Poeira, que cruzamos e pola beira esquerda avanzamos ata a pasarela metálica de As Amolares, que ponnos outra vez na ribeira dereita e que non abandonamos ata o noso remate na praia fluvial de Mondariz Balneario.
Podedes facer o percorrido sen necesidade do track do GPS, tendo coidado de facer os cambios de beira onde os sinalei e tendo en conta que a ruta ten treitos en común co sendeiro Ríos e Montes de Mondariz. Trátase de seguir sempre marxes do río Tea.