Sendeiros de Outono. Pisadiñas - Vilameá - Laza

Roteiro de dificultade media, na subida á Estación arqueolóxica das Pisadiñas. Limpada e recuperada para a súa visita no 2020 pola Comunidade de Montes de Laza, Cimadevila e Souteliño. Está indicada con sinais e consta de paneis explicativos dos petroglifos que se poden ver en cada peneda.
Síguese o roteiro, polo Monte Lastredo, ata as Penedas dos Vieiros, dúas penedas no alto do Colladiño a 808m dende onde se ve Laza, Souteliño e Vilameá.
No camiño cara Vilameá trátase de evitar ó máximo os tramos de asfalto, anque hai que facer un pequeno treito pola estrada que une Cimadevila con Currichouso. Así adéntrome en camiños que marca o mapa raster do IGN que a día de hoxe están pechados e fanse difíciles. Algún deles, marcados nas fotografías, seguidos estrictamente polo gps sen haber marca de sendeiro tan sequera no treito real. Débese ter en conta e ir pola estrada se queres evitarte andar entre toxos e acacias.
No camiño a Vilameá atópase unha ponte derruída sobre o Regato da Garabita. Vese dende o alto, non hai paso obrigado por alí. De feito baixo pensando que son as ruínas dun muíño. O que se atopan son dous pilares de pedra de cachotes e restos de trabes de madeira carcomidas polo musgo e o tempo. O regueiro ten un tramiño de muros de cachotería xusto despois da ponte. Xa non se intúe camiño de paso por esta ponte. É unha mágoa que este patrimonio se bote a perder pola falta de uso e polo desleixo da administración na súa conservación.
Chégase a Vilameá e visítase a Ermida de Santa Lucía, unha capela con nave rectangular construída entre os séculos XVI e XVIII, con cuberta de tella cerámica a catro augas, e na fachada un cabildo sen columnas, con bancos corridos, apoiados na extensión dos propios muros. Porta adintelada, franqueada por dúas pequenas fiestras cadradas e remata a fachada cunha modesta espadana dun só oco e unha cruz de pedra (datos de patrimonio galego). A festa na súa honra é o 13 de decembro.
Vóltase de camiño a Laza polo Alto da Costa da Rúa, onde está situada a base da brigada helitransportada BRIF, con tela metálica polo que hai que rodeala.
No canto de volver polo alto de Laza, pódese meter un no pobo e visitalo. Neste caso non se fai porque ó pasear habitualmente con cans, trato de evitar as zoas de paso de coches.