Subida ó Montouto

Subida polo río Xabriña ata o alto do Montouto. Prólogo de Bare:
Para este novo roteiro, imos prosseguir a nossa xeira polo sector sur da Dorsal Galega na bisbarra da Paradanta. Sabemos que o Val de Tiela (o do alto Tea) é o que separa as serras do Suído e a do Faro de Avión (já visitada por este grupo), que se estende polo sur até a Portela de Deva (809 m) por onde passa a estrada de Pontevedra à Caniza. O seguinte passo importante através da Dorsal Galega cara ao sur é a Portela da Franqueira (745 m). Assi, temos entre estes dous portos un novo grupo montanhoso que son os Montes de Fontefria, que acadan a sua máxima altitude no Alto do Montouto (947 m).

E a maneira máis fermosa de ascender este cúmio é começar na parróquia de Santa Maria de Paranhos (no lugar de Portocortinhas) para subir polo val do rio Xabrinha. Este treito está sinalizado coma PR-G 119 (Rota do Xabriña).

Sobra dizir que esta parte é un espectáculo, avançando entre mestas fragas, visitando vários muinhos e vendo as fervenças do rio, especialmente cando se passa polo Poço do Demo.

Entre as parróquias do Prado de Canda e a Lamosa, chegaremos a un ponto no que a rota marcada abandona o val para subir cara às aldeas, mais nós seguiremos o curso do rio a montante até atopar a estrada que une estas duas parróquias. A partires deste ponto começa a parte montanheira do percurso. Sen perder de vista o rio, trata-se de ir ganhando altitude rapidamente polas pistas e carreiros que atravessan a aba oeste do Montouto, até conseguir rodear o cúmio polo sur (tendo já boas vistas sobre a Paradanta e o Minho), e entrar na parróquia de San Sebastián das Achas para acadar o pequeno planalto da Chan dos Mouros.

O nome já nos adianta que estamos nun lugar de lenda. O máis característico da Chan dos Mouros é a pequena lagoa (ou charca, máis ben) que se forma no seu centro en épocas de choiva (e que chega a estar congelada no inverno se hai frio abondo).

A hipótese máis espectacular sobre a lagoa é que se trata do cráter de impacto dun meteorito, que, polos indícios atopados, até se poderia dizer que caeu no período Neolítico. Seria, portanto, un acontecemento contemporáneo da época da construción de monumentos megalíticos como as mámoas.

O que si atopamos neste lugar é un empraçamento arqueológico singular, con até três mámoas construídas arredor do suposto cráter, e un recinto circular de pedras fincadas que cerca todo o espaço. Estea ou non relacionado co suposto meteorito, é evidente que se trata dun lugar sagrado. Especialmente interessante é o círculo megalítico, pola rareza deste tipo de monumentos na Galiza.

Ben, despois de jantar na Chan dos Mouros e subir até o cúmio para admirar as vistas, o que falta é descer até o planalto de Fontefria (aproveitando para visitar un outro conjunto de mámoas), contando con que deixaremos algun veículo nas beiras da estrada N120 para artelhar o regresso. En total, 11 km. Moi assequível...