Tetir, circular por Montaña de Enmedio, Morro de la Atalaya, Morro de las Piteras, etc (Puerto del Rosario)

Seguindo, con modificacións, este track: https://gl.wikiloc.com/rutas-sendeirismo/circular-por-la-montana-de-jaifa-fuerteventura-37447667
Percorrido interesante, aínda que o modificaría bastante logo de telo feito.
Comeza a carón do restaurante Casabel, onde se pode estacionar. Ao chegar a un punto da ruta que se seguía descubrimos que os cans defenden unha granxa de res e que se trata dunha finca privada polo que decidimos variar o percorrido subindo cara a montaña. ERRO! A ascensión resulta custosa. (Logo exporei a miña proposta para facer esta camiñada máis doada e segura). Na parte alta hai unha terraza natural onde hai uns gravados rupestres dos habitantes orixinarios da illa. Dicir que se atopan nun estado penoso, cheos de pintadas e riscadas. É inaudito que estean sen protección!! Por outro lado mostran a "cultura" imperante: nesta nova xornalística vese en que consiste o "patriotismo" españolista tan en boga: https://noticiasfuerteventura.com/fuerteventura/el-gobierno-restaura-los-grabados-rupestres-de-montana-jaifa
A baixada cara a Degollada de Jaifa é afortunadamente máis doada. Logo de camiñar un treito a carón da estrada FV-225, tórcese cara o Valle de Jaifa e seguindo un camiño bastante pino, e logo carrouchos de cabra, chégase ao alto de Morro de la Atalaya dende onde se domina unha ampla panorámica todo en volta.
Seguindo polo lombo de Morro de las Piteras e Castillejo Grande, chégase ao cume de Castillejo Chico, onde hai un depósito de augas e dende onde se domina visualmente unha ampla zona da capital e da costa.
A baixada volve ser por un camiño ben ladeiroso ata que na aba se atopa outro depósito de abastecemento de auga. Aquí, por non andar a valmonte, dirixímonos cara a estrada citada e, por devasas que descorren á súa beira (e mais pola da FV-20), volvemos ao punto de comezo.
Como queda dito, a ruta vai por camiños abertos pero tamén en treitos a valmonte ou polas bermas de estradas. Tén bastante desnivel nalgúns puntos.
NON RECOMENDO seguir este trazado tal cal. SUXIRO, ou ben seguir as bermas da estrada coma na volta ata a Degollada de Jaifa e aquí facer a subida á Montaña de Enmedio (Jaifa) e volver ou, directamente comezar a ruta na derivación cara esta montaña dende a FV-225 (está indicado cun waypoint). Evitamos así pasar por onda a granxa e provocar aos cans gardiáns, así como un percorrido sen moito interese.