TOLOSA - MENDIKUTE - URAITZ - HERNIOZABAL - TOLOSA

07 ABR 2021 14:52

Ordu batzuk ibiliz egin dezakezun ibilbidea duzu hau (lasai ibilita, 6 ordu inguru...).

Tolosatik ateratzeko tren geltokia-apeaderoa erabili dut. San Franzisko eliza ondotik Montezkura doan bidea hartuta ere abiatu zaitezke. Trenbidearen gainetik pasa eta gutxira etxetartetik ezkerretara abiatzen den bidea hartuz. Nire kasuan, leku horretara goitik beherantz eginez iritsi naiz.

Edozein kasutan "GR 285 MENDIBAI ibilbidea"ren arrastoak jarraituko ditugu Malaka baserria pasa eta aurreraxeago dagoen bidegurutzean dagoen ataka arte.

Ataka gurutzatu eta pagadian sartuko gara. Bidea utzi gabe, beti gorantz, Urkizutik Erniozabalerantz doan porlanezko pistara aterako gara.

Pista hartu orduko, pittin bat aurrerago iturria daukagu. Handik 50 metrotara edo, ezkerretara hartu eta zailtasun handiegirik gabe Arantzabeaitzara iritsiko gara. Bidean atzera egin, pista hartu eta honen amaieraino igoko gara. Bertan eskuinera, bere antena erraldoi eta guzti, Artegietako gaina dugu. Oso erraz iritsiko gara bere tontorrera. Atzera pista amaierara itzulita, oso erraz iritsiko gara baita Olamuño gainera.

Pista amaierara itzulita, bordaraino doan gurdibidea hartuko dugu eta bertara inongo eragozpenik gabe iritsiko gara. Behin bordara iritsita, ataka gurutzatu eta, biderik egon ez arren, erraz iritsiko gara basoa azpialdetik igarotzen duen pistaraino. Behin pistara iritsita, ezkerretara egingo dugu atakaraino. Hor, eskuinera abiatzen den gurdibidea hartu beharko dugu Mendikutera iristeko.

Gurdibide hau hartzen dugunean, eta gutxi gora behera 5 bat minutuetra ( ? ) bide zabala utzi beharko dugu ezkerretara petrila pasata. Erne egon ez arren, bidean aurrera egingo dugu, oso erraz, gainera.

Hemendik aurrera belazea gurutzatuko dugu eta berriro basoan sartu. 100 bat metrotara edo, Albiztur aldetik datorren bidea aurkituko dugu, bi marra gorri paralelo jarraituz hartuko duguna. Bide honek zuzen-zuzen tontorreraino eramango gaitu. Kobazulora joan nahi badugu, erne ibili beharko dugu bidegurutzea leku egokian hartzeko.

Mendikuteko gainean gaztelu baten aztarnak daude. Ikusmira ere sekulakoa da.

Hortik aurrera bidea oso ondo markatua dago eta ez duzu inongo arazorik izango Lizarbakar azpiko iturriraino iristeko. Hemen, eskuinera Lizarbakar oso gertu dugu, baina guk ezkerretara hartuko dugu Uraitz tontor aldera. Bidea oso garbi dago, baina kontu piska bat izan behar dugu "Arrozpideberriko borda" parean, Uraitzeko aldapa hasten den lekuan, bidezidorra belar artean piska bat despistatu egiten baita.

Uraitzera iritsita oso erraz itzuliko gara Erniozabalera, "GR 285 MENDIBAI ibilbidea"ren arrasto zuri-gorriak jarraitu behar baititugu. Erniozabalek eskaintzen digun ikusmira ez da nolanahikoa, kostaldera zein barrualdera ere.

Oso ondo markatuta dugu Lizarbakarreraino doan bidea. Hemen, artzai-txabola ondoko ataka gurutzatu eta Hernialderaino eramango gaituen bidezidorra hartuko dugu. Bide hau ere oso garbia da, inolako arazorik gabe jarraitzeko modukoa.

Hernialden atseden txiki bat egiteko leku ederra dugu, haurren parkean zein kontzejuko tabernan, norberaren aukeran.

Herritik behera abiatzean, lehenengo errebuelta parean desbideratu eta Eguzkitza baserri ondotik pasatzen den pista hartuko dugu. Behin Eguzkitza basarria pasata, garbi ikusiko dugu beheko errepideraino jaisten den bidezidorra. Bidezidor horretatik jaitsi behar gara, bidea gurutzatu eta zuzen parean aurkituko dugun gurdibidetik jarraitu.

Bide honek Hernialdeko errepide nagusiraino eramango gaitu. Hura gurutzatu eta aurreraxeago jarraitzen duen gurdibidea hartu behar dugu. Bidean jaitsiz Hernialdeko Bentaraino iritsiko gara.

Han, Anoertatik datorren bidegorria hartu eta Tolosaraino iritsiko gara.