Tolosa-Montesku-Lizarbakarra erreka-Hernialde- Tolosa

24 MAR 2021 - 16:03

Ordu gutxi batzuk ibiliz egin dezakezun paseoa duzu hau ( 3 ordu inguru...).

Tolosatik ateratzeko tren geltokia-apeaderoa erabili dut. San Franzisko eliza ondotik Montezkura doan bidea hartuta ere abiatu zaitezke. Trenbidearen gainetik pasa eta gutxira etxetartetik ezkerretara abiatzen den bidea hartuz. Nire kasuan, leku horretara goitik beherantz eginez iritsi naiz. Edozein kasutan "GR 285 MENDIBAI ibilbidea"ren arrastoak jarraituko ditugu Malaka baserria pasa eta aurreraxeago dagoen bidegurutzea arte.

Bidegurutze honetan eskuinera hartuko dugu eta bertan ere arrasto txuri-horiak jarraituz aurrera egingo dugu ( PR-Gi 114 Tolosa - Urkizu ). Bide hau utzi gabe Lizarbakarra errekaraino jarraituko dugu.

Behin errekara iritsitakoan, bere ezkerretatik gora aldera joango gara 50 metro inguru, ondo zapalduta dagoen bidezidor batetik barrena.

Behin puntu honetara iritsita erreka igaro eta Hernialde aldera igotzen hasiko gara. Bidea oso garbia eta erraza da Hernialderaino.

Herritik behera abiatzean, lehenengo errebuelta parean desbideratu eta Eguzkitza baserri ondotik pasatzen den pista hartuko dugu. Behin Eguzkitza basarria pasata, garbi ikusiko dugu beheko errepideraino jaisten den bidezidorra. Bidezidor horretatik jaitsi behar gara, bidea gurutzatu eta zuzen parean aurkituko dugun gurdibidetik jarraitu.

Bide honek Hernialdeko errepide nagusiraino eramango gaitu. Hura gurutzatu eta aurreraxeago jarraitzen duen gurdibidea hartu behar dugu. Bidean jaitsiz Hernialdeko Bentaraino iritsiko gara.

Han, Anoertatik datorren bidegorria hartu eta Tolosaraino iritsiko gara.