Trasmiras, circular por varias aldeas da montaña.

Interesante ruta cun só defecto: ten moito asfalto (cuestión de opinións, claro). Comezamos no núcleo capitalino do concello, descubrindo que a parte antiga garda varios elementos da súa configuración tradicional. Sucesivamente atoparemos as aldeas de Soutelo e Chamosiños (visita á súa igrexa de Santa Baia, interesante). A partir de aquí comeza a subida cada a zona máis montañosa pasando por por Queirugás (cruceiro e aldea) ata chegar a Vilar de Lebres, unha aldea con aires de vila polo menos na cara que mira á estrada OU-1107 xa que a parte antiga está moi abandonada. En saíndo da aldea, coma a un quilómetro, atopamos unha pequena xoia románica: a Igrexa Vella, ou de San Salvador. Suponse que dos séculos XII-XII, ten poucas reformas posteriores polo que conserva a súa traza e moitos elementos orixinais: portada, xanela na cabeceira, canzorros... Dende alí continúase ata a aldeíña da Serralleira e máis tarde á de San Andrés. Por estas zonas imos vendo unha boa panorámica da Limia e a contorna: Serra do San Mamede, do Larouco... A continuación imos cara o Castelo, ese picacho que se ve pasando pola A-52 e que pola súa parte traseira é tan accesible. Aquí está a aldea do Mesmo nome.
Agora xa toca baixar cara Vila do Rei, ou Viladerrei, e seguindo a estrada voltar ao punto de comezo.
Todo o percorrido se fai por estradas, pistas ou camiños ben limpos (polo menos neste momento). En xeral é bastante descuberta, atención á días de moito sol, que pode ser desagradable! Nas aldeas adoita haber billas onde coller auga. O perfil non é matador, polo que podería ser camiñado por calquera persoa cunha mínima preparación e equipamento. Non é unha ruta marcada, polo que o uso de GPS é moi útil.
Como queda apuntado, é unha ruta moi "visual", na que poderemos gozar da arquitectura, da arte e das paisaxes.
Feita seguindo esta: https://gl.wikiloc.com/rutas-sendeirismo/trasmiras-comarca-da-limia-ourense-ruta-por-trasmiras-19875810 aínda que con algunha variación.