TREKING POLO geoparque montañas do COUREL. Ruta do oso cavernario. Etapa 1A de HOSPITAL DA CONDESA A SEOANE DO COUREL

TREKING POLO GEOPARQUE MONTAÑAS DO COUREL
RUTA DO OSO CAVERNARIO
Do Camiño de Santiago polo Lor ao Sil e volta polos vales do poñente.

Que mellor área xeográfica natural en Galicia que a Serra do Courel para facer un treking. É o único espazo natural galego coa categoría de geoparque e como tal foi recoñecido pola UNESCO no 2019. Neste geoparque deseñamos a ruta do Oso Cavernario que consta de sete etapas das que a segunda, a terceira e a metade da cuarta corresponden coa antiga Baixada do Lor, ruta que historicamente une O Cebreiro, nos altos da Serra de Rañadoiro, polo que decorre a parte de máis altitude do Camiño de Santiago ata a desembocadura do Lor no Sil en Augasmestas (Quiroga). A segunda parte da cuarta etapa e as tres últimas consisten en subir polo Courel do Poñente percorrendo en parte bacías do Loureiro e do Lóuzara, ámbolos dous afluentes do Lor. Para a primeira etapa danse dúas alternativas diferentes, a primeira que vai ao encontro do Lor por Esperante e que ten uns 4 quilometros de estrada, e a segunda por Noceda e a mina da Toca.
O nome da ruta “Oso Cavernario” ven de que o Courel foi poboado por osos dende hai moitos milenios e como proba están a cantidade de osamentas de oso cavernario atopadas nas covas do Courel, moitas sitas a vista de paxaro de onde discorre a ruta.

Etapa ORIGEN DESTINO SEGUNDO orux maps
DISTANCIA DESNIVEL + DESNIVEL -

1A por Esperante. Hospital da Condesa Seoane do Courel 18,71 km 437 m 1041 m
1B por A Toca. Hospital da Condesa Seoane do Courel 17,7 km 620 m 1224 m
2 Seoane do Courel Froxán 22,51 km 699 m 872 m
3 Froxán Conceado do Lor 18,29 km 540 m 737 m
4 Conceado de Lor Vilachá de Salvadur 16,54 km 633 m 430 m
5 Salcedo Vilamor 15,63 km 650 m 607 m
6 A Pendella Paderne 22,17 km 1180 m 693 m
7 Paderne Hospital da Condesa 21,49 km 1130 m 790 m
TOTAL 135,34 km 5269 m 5170 m

ETAPA 1 DE HOSPITAL DA CONDESA A SEOANE DO COUREL – Opción A (por Esperante).

Comezarémola ruta no camiño e Santiago, cando pasa polo desgastado cordal da Serra de Rañadoiro, xusto en Hospital da Condesa, co bule-bule dos romeiros que van a Santiago. Deixaremos de contado este balbordo de xente para comezar a baixar cara ao Courel. Nuns quilómetros atopamos a aldea de Seixo, que é berce de gaiteiros, onde aínda funciona a única panadaría do Courel, que visitaremos e que conta con pagada sona xa que vende os seus moletes de trigo galego tan lonxe como en Barcelona. A andaina segue cara abaixo ata Lousadela onde poderemos ver ao lonxe a bacía do Lor. Aquí comeza a aproximación ao Lor que decorre a bacía que está a nosa esquerda. Seguindo pola estrada teremos que rexeitar varios dos carreiros que van cara o gran río do Courel xa que indefectiblemente están pechados de vexetación, debido ao abandono das administracións do secular carreiro que o vertebraba.
Despois de albiscar as cabanas de Paparón abandonaremos a estrada nas casa dabaixo da aldea de Piñeira para cruzar por primeira vez o Lor que aquí xa é algo grandiño. Gozaremos dun merecido descanso no bonito camping de Esperante. So queda subir a traveso dun mesto bosque a aldea que leva o seu nome coa súa forte igrexa para baixar entre soutos á unha ponte nova de madeira. So queda unha última subida que nos leva á Aula da Natureza da Universidade de Santiago, adicada a estudos courelianos, xa nas aforas de Seoane. Nesta etapa cruzaremos o Lor 2 veces.

ALOXAMENTOS E DATOS DE INTERESE: En Hospital da Condesa Bar o Tear. En Seoane Casa Ferreiro (tf: 697 18 79 95) de turismo rural da pensión completa. Tamén hai o Restaurante Anduriña, outras dúas casa de turismo rural e dous supermercados.