TREKING POLO GEOPARQUE MONTAÑAS DO COUREL. RUTA DO OSO CAVERNARIO. Etapa 3 de FROXAN a CONCEADO DE LOR

TREKING POLO GEOPARQUE MONTAÑAS DO COUREL
RUTA DO OSO CAVERNARIO
DO CAMIÑO DE SANTIAGO POLO LOR AO SIL E VOLTA POLOS VALES DO POÑENTE

Que mellor área xeográfica natural en Galicia que a Serra do Courel para facer un treking. É o único espazo natural galego coa categoría de geoparque e como tal foi recoñecido pola UNESCO no 2019. Neste geoparque deseñamos a ruta do Oso Cavernario que consta de sete etapas das que a segunda, a terceira e a metade da cuarta corresponden coa antiga Baixada do Lor, ruta que historicamente une O Cebreiro, nos altos da Serra de Rañadoiro, polo que decorre a parte de máis altitude do Camiño de Santiago ata a desembocadura do Lor no Sil en Augasmestas (Quiroga). A segunda parte da cuarta etapa e as tres últimas consisten en subir polo Courel do Poñente percorrendo en parte bacías do Loureiro e do Lóuzara, ámbolos dous afluentes do Lor. Para a primeira etapa danse dúas alternativas diferentes, a primeira que vai ao encontro do Lor por Esperante e que ten uns 4 quilometros de estrada, e a segunda por Noceda e a mina da Toca.
O nome da ruta “Oso Cavernario” ven de que o Courel foi poboado por osos dende hai moitos milenios e como proba están a cantidade de osamentas de oso cavernario atopadas nas covas do Courel, moitas sitas a vista de paxaro de onde discorre a ruta.

Etapa ORIGEN DESTINO SEGUNDO orux maps
DISTANCIA DESNIVEL + DESNIVEL -
1A por Esperante Hospital da Condesa Seoane do Courel 18,71 km 437 m 1041 m
1B por A Toca Hospital da Condesa Seoane do Courel 17,7 km 620 m 1224 m
2 Seoane do Courel Froxán 22,51 km 699 m 872 m
3 Froxán Conceado do Lor 18,29 km 540 m 737 m
4 Conceado de Lor Vilachá de Salvadur 16,54 km 633 m 430 m
5 Salcedo Vilamor 15,63 km 650 m 607 m
6 A Pendella Paderne 22,17 km 1180 m 693 m
7 Paderne Hospital da Condesa 21,49 km 1130 m 790 m
TOTAL 135,34 km 5269 m 5170 m

ETAPA 3: DE FROXAN A CONCEADO DE LOR

Saímos de Froxán bebendo da fonte do Milagre antes de continuar pola marxe dereita por unha ladeira con albarizas. Entre elas, trataremos de recoñecer cal foi a reconstruída durante a rodaxe de Calleja no Courel. O río enfóuzase entre altos noiros anunciando que val do Courel está a rematar. En fronte unha ollada á derradeira aldea do Courel, a belida Castro Portela. Se cadra seremos quen de albiscar na beira contraria o furado que deixou a mina romana de Rendar. O camiño chega ao Souto de Paramedela co seu sequeiro rehabilitado pola Xunta, cruza o segundo afluente máis importante do Lor, o Loureiro, para chegar a un refuxio de pesca coa súa ponte colgante sobre o Lor. Queda unha subida por unha ampla pista que pasa polo miradoiro de Penas Altas. Xa en baixada acadamos o casarello das Laceiras onde vive un artesán que nos pode ensinar o seu pequeno museo do coiro e madeira. Alí poderíase ter posibilidade de pasar a noite en caso de necesidade se se contase con avituallamento. En todo caso pódese coller auga na súa fonte agochada nunha cova. Un estreito carreiro construído polo artesán permite baixar a empinada encosta para chegar de novo á beira do Lor. Ao pouco aparecerá un acceso ao río que nos permitirá tomar un baño nun remanso de paz. Unha nova ponte colgante e chegamos ás ruínas da Ferrería de Barxa de Lor. Máis adiante aparecen as ruínas dea aldea de Barxa, para logo na aldea da Ponte de Barxa de Lor ver a seu magnífica ponte medieval. Aquí o bacía do Lor deixa a estreitura das pasadas xornadas para conformar un amplo val. So quedan uns 2 quilómetros para chegar a Conceado do Lor, final de etapa, que nos fixemos pola estrada xeral.

Datos de Interese:
En Conceado Hostal Río Lor (Tf 650969299) ofrece aloxamento e manutención. Antes na Ponte de Barxa de Lor está o Hostal Pacita (Tf: 982430008), no que hai que preguntar antes, xa que pode estar pechado.
Nas Laceiras pódennos ofrecer durmida en caso de necesitala.