TREKING POLO GEOPARQUE MONTAÑAS DO COUREL. RUTA DO OSO CAVERNARIO. Etapa 4: De CONCEADO a AUGASMESTAS e VILACHA DE SALVADUR.

TREKING POLO GEOPARQUE MONTAÑAS DO COUREL
RUTA DO OSO CAVERNARIO
DO CAMIÑO DE SANTIAGO POLO LOR AO SIL E VOLTA POLOS VALES DO POÑENTE

Que mellor área xeográfica natural en Galicia que a Serra do Courel para facer un treking. É o único espazo natural galego coa categoría de geoparque e como tal foi recoñecido pola UNESCO no 2019. Neste geoparque deseñamos a ruta do Oso Cavernario que consta de sete etapas das que a segunda, a terceira e a metade da cuarta corresponden coa antiga Baixada do Lor, ruta que historicamente une O Cebreiro, nos altos da Serra de Rañadoiro, polo que decorre a parte de máis altitude do Camiño de Santiago ata a desembocadura do Lor no Sil en Augasmestas (Quiroga). A segunda parte da cuarta etapa e as tres últimas consisten en subir polo Courel do Poñente percorrendo en parte bacías do Loureiro e do Lóuzara, ámbolos dous afluentes do Lor. Para a primeira etapa danse dúas alternativas diferentes, a primeira que vai ao encontro do Lor por Esperante e que ten uns 4 quilometros de estrada, e a segunda por Noceda e a mina da Toca.
O nome da ruta “Oso Cavernario” ven de que o Courel foi poboado por osos dende hai moitos milenios e como proba están a cantidade de osamentas de oso cavernario atopadas nas covas do Courel, moitas sitas a vista de paxaro de onde discorre a ruta.

Etapa ORIGEN DESTINO SEGUNDO orux maps
DISTANCIA DESNIVEL + DESNIVEL -
1A por Esperante Hospital da Condesa Seoane do Courel 18,71 km 437 m 1041 m
1A por A Toca Hospital da Condesa Seoane do Courel 17,7 km 620 m 1224 m
2 Seoane do Courel Froxán 22,51 km 699 m 872 m
3 Froxán Conceado do Lor 18,29 km 540 m 737 m
4 Conceado de Lor Vilachá de Salvadur 16,54 km 633 m 430 m
5 Salcedo Vilamor 15,63 km 650 m 607 m
6 A Pendella Paderne 22,17 km 1180 m 693 m
7 Paderne Hospital da Condesa 21,49 km 1130 m 790 m
TOTAL 135,34 km 5269 m 5170 m
Saímos de Conceado comezando unha lixeira subida que nos leva a aldea de San Pedro, onde temos boas vistas do val. Cruzamos o Lor en Margaride onde hai un bar a carón da estrada xeral. Xa na aldea visitaremos as descoñecidas Covas do Medo. Algunhas das casas desta aldea aséntanse na chaira que deixou unha explotación aurífera dos romanos. No fronte da explotación hai tres covas como mostra do proceso de “ruína montiun” que empregaban para a extracción do ouro, das que unha contén un sinxelo museo etnográfico. O camiño empolícase ao enfouzarse de novo o val, regalando despois unhas vistas marabillosas do estuario que forma o Lor ao desembocar no Sil formando unha península onde se asenta o poboado de Augasmestas. Na aldea de Covas veremos unha casa tipo castelo e preto de alí comezámola derradeira baixada, cruzando logo pola última das pontes sobre o río. En total con esta haberemos pisado 2+3+3+2, ou sexa 10 pontes sobre o Lor ao longo destes 4 días. Dende a aldea de Parada, que conta con dúas casas habitadas, despedímonos do Lor e dámoslle a benvida ao Sil. Unha casa en ruínas sita nun promontorio con boas vistas. E que mellor para saudar ao Sil, senón facendo unha ruta entre os bancais milenarios no que se cultivan as cepas que lle deron merecida sona aos viños desta Ribeira Sacra. Cando xa levamos percorridos uns cantos bancais chegamos ao lugar chamado Os conventos, con restos recentemente escavados dun mosteiro. E así iremos cara as adegas medievais de Vilanova de Salvadur, as máis antigas constatadas. Eran 40 adegas, dependendo do Mosteiro de Montederramo, que foron rehabilitadas hai unhas 30 anos con fondos Feder. Alí unha emprendedora, dona da súa pequena adega Val do Frade, fará de anfitrioa, ensinándonos o lugar e a súa historia e aínda nos falará dos restos recentemente descubertos do enigmático mosteiro. Tamén nos ofrecerá unha degustación dos seus viños cunha tapa por un custe testimonial.

DATOS DE INTERESE.
En Vilachá Puri da adega Val do Frade pódenos ofrecer unha degustación (Tf: 616243250).
Iván Taxista (Tf: 6172128699 pode facer o único traslado obrigatorio de toda a ruta dende Vilachá ata Salcedo.
En Salcedo Hotel O Forno - Casa rural A Salanova ofrece aloxamento e mantenza (tf: 982430501)