TREKING POLO GEOPARQUE MONTAÑAS DO COUREL. RUTA DO OSO CAVERNARIO. Etapa 6: De VILAMOR (ou A Pendella) a PADERNE.

TREKING POLO GEOPARQUE MONTAÑAS DO COUREL
RUTA DO OSO CAVERNARIO
DO CAMIÑO DE SANTIAGO POLO LOR AO SIL E VOLTA POLOS VALES DO POÑENTE

Que mellor área xeográfica natural en Galicia que a Serra do Courel para facer un treking. É o único espazo natural galego coa categoría de geoparque e como tal foi recoñecido pola UNESCO no 2019. Neste geoparque deseñamos a ruta do Oso Cavernario que consta de sete etapas das que a segunda, a terceira e a metade da cuarta corresponden coa antiga Baixada do Lor, ruta que historicamente une O Cebreiro, nos altos da Serra de Rañadoiro, polo que decorre a parte de máis altitude do Camiño de Santiago ata a desembocadura do Lor no Sil en Augasmestas (Quiroga). A segunda parte da cuarta etapa e as tres últimas consisten en subir polo Courel do Poñente percorrendo en parte bacías do Loureiro e do Lóuzara, ámbolos dous afluentes do Lor. Para a primeira etapa danse dúas alternativas diferentes, a primeira que vai ao encontro do Lor por Esperante e que ten uns 4 quilometros de estrada, e a segunda por Noceda e a mina da Toca.
O nome da ruta “Oso Cavernario” ven de que o Courel foi poboado por osos dende hai moitos milenios e como proba están a cantidade de osamentas de oso cavernario atopadas nas covas do Courel, moitas sitas a vista de paxaro de onde discorre a ruta.

Etapa ORIGEN DESTINO SEGUNDO orux maps
DISTANCIA DESNIVEL + DESNIVEL -

1A por Esperante Hospital da Condesa Seoane do Courel 18,71 km 437 m 1041 m
1B por A Toca Hospital da Condesa Seoane do Courel 17,7 km 620 m 1224 m
2 Seoane do Courel Froxán 22,51 km 699 m 872 m
3 Froxán Conceado do Lor 18,29 km 540 m 737 m
4 Conceado de Lor Vilachá de Salvadur 16,54 km 633 m 430 m
5 Salcedo Vilamor 15,63 km 650 m 607 m
6 A Pendella Paderne 22,17 km 1180 m 693 m
7 Paderne Hospital da Condesa 21,49 km 1130 m 790 m
TOTAL 135,34 km 5269 m 5170 m

ETAPA 6: De VILAMOR (ou A PENDELLA) a PADERNE

Poderemos evitar un treito de piche dende Vilamor ata A Penella de 3,5 km se collemos o taxi de Carlos (opcional). Pouco despois de Touzón cruzaremos a ponte de Sudrios sobre o Lóuzara pouco antes da desembocadura no Lor. Seguiremos o Lóuzara pola súa marxe esquerda, cruzando o ferrruxinoso rego de Augas Rubias. Máis arriba baixamos a ver o magnífico arco da Vella, un acueduto sobre o Lóuzara que levaba auga á ferrería de Lousadela e aos prados próximos. Máis adiante topámonos coa que seguramente e mellor poza do Courel, unha queda de auga atravesada por unha ponte que nos leva a ferrería, hoxe en día en ruínas. Outra ponte e comezamos a subida distanciandonos máis e más do leito do río. Así chegamos a aldea de Cortes, moi ben conservada con casa realmente fermosas e habitada so por dúas ou tres persoas.
Comezamos a coller altura sobre o Lóuzara unha pista que sube e sube sen parar. Desviámonos á aldea de Gamiz de un habitante para coller auga na súa fonte lavadeiro. As magnificas vistas do val do Lóuzara pódennos deixar albiscar dúas aldeas no fondo do val, a fermosa Santalla Dabaixo, mágoa de non podela visitar- e a gandeira Santalla Darriba coa súa cova de pagada sona. Seguimos subindo ata que damos co alto da Pedra que separa as bacías do Lóuzara e do Lor e que asemade fai linde entre os concellos de Samos e de Folgoso do Courel. Cambiamos de dirección baixando cara o leste polo val do río Pequeño, pasando pola aldea de Pedrafita ata chegar ao fin de etapa en Paderne. Foi aldea de músicos, de gaiteiros e acordeonistas como reza no monumento que ollaremos. Tamén foi terra de cereais do que dan testemuña as varias airas que atoparemos. Paderne é un paraíso do turismo rural con dúas casas rurais que ofrecen aloxamento.

DATOS DE INTERESE
En Paderne hay dúas casa de Turismo rural que ofrecen aloxamento e mantenza: Casa Caselo (tf: 982 16 57 68) e Casa das Triegas (tf: 982 185 110).
No caso de querer evitar o tramo inicial de piche (3,5 km) ata a Pendella, podemos contactar co taxi de Carlos en Vilamor (tf: 655 86 25 87)