Ubide Zizkino Oketa Ubide zirkularra

Herriaren sarreran aparkatu ondoren, Udaletxe aldera joko degu Zubizabala erreka gurutzatzen duen zubitik. Udaletxea pasata ezkerrera egingo degu Zubixola errekaren gainetik doan zubirantz . Hau gurutzatu eta jo ezkerrera, segidan eskubitik doan pistatik gora egingo degu langa batekin topatu arte, gurutzatu eta gorantz eramango gaitu bideak.
Zoko erreka eramango degu gure ezkerrean eta momentu batean daramagun pista utzi eta ezkerrera doan pista bat hartuko dugu erreka hori gurutzatuaz arazorik gabe. Agian euri asko egin ondoren edo neguan, zailtasun gehiago izango du.
Pista honek eramango gaitu Zizkino mendiaren azpian dagon Zizkino txabolara eta hemendik mendia inongo arazorik gabe eskuratuko dugu bistan degun mendi-hegaletik zuzenean. Mendixka dotorea, polita.
Berriz jetsiko gara txabolara eta hemen Oketa aldera doan pista jarraituko dugu.(100 metrotara edo Gerra Zibilean Disziplina batailoiak ezkutatzeko erabiltzen zuen leizea aurkitu dezakegu) berriz pista hartu eta aurrerago bat bateko bira egingo degu ezkerrerantz. Hemendik jarraitu eta momentu batean eskubira jo dugu garo artetik Oketa biderantz eta bide berde argi batetik gora Oketara.
Gaur aukera gutxi denbora asko gainean egoteko, haizea, hotza eta euri arriskua, baina igoera guztian eta goian bista ederrak, Urrunagoko presa, Durangesadoa, Gorbea aldera... benetan asko disfrutatzekoak.
Jeskeran arazorik gabe pagadi zoragarri bat pasatuaz, pago lepa motz zahar eta ederrak. Bidean behera jetsi ondoren pista batekin aurkituko gara eta hau ezkerrerantz hartuaz jarraituko dugu Lisaranda izena duen aterpe bat aurkitu arte. Gaur hemen bazkaldu dugu, euria goi ta be. Atertu ondoren pista jarraitu eta adi egon behar da segituan eskubira ateratzen den beste pista bat hartzeko. Honek aldapan behera eramango gaitu Undebe errekaraino, gurutzatu ondoren goitik datorren beste pista bat hartu eta eskubirantzeko norabidea hartu ondoren Ubidearaino eramango gaitu.