URKAREGI - KANPAIZULO - IRUITXURRI - KALAMUA | | Megalitoak bisitatuz

Eguraldi eder hau aprobetxatzeko asmoz osteratxo bat egitea bururatu zait. Horretarako, Elgoibar eta Etxebarria lotzen dituen GI- 2636 errepideko 6. kilometroan gutxi gora behera hasi dut gaurko ibilbidea, URKAREGI mendatean hain zuzen ere.

GR baten marka zurigorriei jarraituz joan naiz hasieran.
Txakur ugari dauden baserri baten ondoko atetik pasa behar da:



Zaldiak aurkitu ditut landan, tentsio altuko kableen azpian:



Etxebarria eta Elgoibar arteko mugarria:


Handik gutxira, bidea lokazten hasten da eta pago eder baten ondotik doa GR bidea:


Atetxo bat zeharkatu ondoren, laster pinudian zehar jarraitzen du nire bideak:


GR 121 markei adi egon behar bidegurutzeetan!




Azken argazki horretako bidegurutzetik 200 metro eskasera, GR seinaleak ahaztu eta Kanpaizuloko tumulua aurkitu nahirik, pinuz estalirik dagoen tontorrera igo dut zuzenean, bidexkarik gabeko basoan zehar:


Azkenik, Goikonekogana tontortxora iritsi eta beheraka noala, Eusko Jaurlaritzak jarritako seinale batekin egin dut topo: "Kanpaizulo Tumulua".


KANPAIZULO TUMULUA, (Koordenatuak WGS84(30T): 544726, 4786731)
Kalamuako estazio megalitikoaren hiru monumentuetako bat da. 20 metroko diametroa duen trikuharri bat da. Erdialdean 4 metroko diametroa eta metro erdiko sakonune bat dauka, baita beste zulo batzuk ere.
Egituraren eraikuntzan erabilitako materialak bertako basaltoak dira.
J. San Martínek aurkitu zuen 1952an. Galdu zela pentsatu zen baina L.Del Barriok berriz aurkitu zuen 2002an.

Kanpaizulo lepora heltzean, GR bidetik irtenda, Iru Iturrira noa ur pixkat edatera:

Iturri hau Elgoibarko Morkaiko mendi elkarteak berriztatu zuen 1954. urtean.

Iturritik berriro bidegurutzera noa eta hemen, GR 121 bidea ahaztu eta Kalamuara noa zuzen zuzenean, zuhaitzik ez dagoen ingurune batetik. Pista zabala da hasiera eta bidexka gero:


Kalamua azpian beste monumentu megalitiko bat dago: OLABURU trikuharria
(Koordenatuak WGS84(30T): 544181, 4786201)

8 metroko diametroa eta 0,70 m-ko garaierako tumulua duen trikuharri bat da. Erdialdean 2,50 m-ko diametroa eta 0,45 m-ko sakonera duen sakonune bat dauka.
Ez ibili trikuharri oso baten bila! Ez baita ganbaren inongo aztarnarik gelditzen gaur egun.
Egituraren eraikuntzan erabilitako materialak bertako ofitak dira.
Joxemiel Barandiaranek 1934an aurkitu eta gero, Telesforo Aranzadirekin batera induskatu zen 1934an , baina ez zuten inolako materialik aurkitu.

Olaburu dolmena zegoen lekutik panoramika ederra da oso: Lea Artibai, itsasoa, Elgoibar....
Igoera konstante batean Kalamuako tontorrera iritsi naiz:


Kontrako norabidetik jaitsi naiz Garagoitxi eta Kalamua arteko lepora. Handik, GR bidea txintxo-txintxo jarraitu dut nire gaurko ibilbidearen hasiera puntora bueltatu arte:


Oso bide zati politak daude, ondo markaturik:


OHARRA: Kalamuako estazio megalitikoaren azken monumentua Diruzulo trikuharria da, pena gaur bisitatzeko denborarik ez izana...

----------------------INGURUKO BESTE IBILBIDE BATZUK:--------------

SALLOBENTEKO SEKRETUAK

IXUA - URKO - AKONDIA - GARAGOITXI

KARAKATE