URRETXU.- Irimo.- 4.ibilaldia

4. IBILALDIA : Santa Barbara- Iturraundi- Arbeleta- Nebera- Aterpetxea.


Distantzia : 6,820 km.
Desnibela : 395 m.

Aterpetxe ondotik abiatuko gara Irimoko gailurrera, Arbeletara eramango gaituen beste bidetik. Agerreko bidea utzi eta goraka doan pista zabala hartuko dugu, Arkaitzaldera, Lizartxoetako etxolara eta Iturraundiko hegira iritsi arte.
Ezkerretik Irimorako bide luzeari jarraituko diogu. Aitzakiarik gabeko bidea, aldapa leuna, oinezkoentzat aproposa. Pausoak aurrera eta berehala Iturraundiko ubidea eta iturria. Aurreraxeago, berriz, Sasiolako eta Arkaitzetako parajeak Hemen eskuineko bihurgunean gora segiko dugu Asarizuloetaraino. Lizarriturriko baso-bidea utzi eta zuzen jarraitzea litzateke. Hurrengoan berriz, Urkietan, toponimo-harriak Kurutzerako ematen digun aldea ezagutu eta jarraitu bide zabalari.Alokaitzetaraino.

Hutzi Kurutzerakoa eta hartu ezkerrekoa Bastanixtazabaleko gaina arte. Goian berriz eskuinera, eta sakonetik irtetean, Arrizuri eta Arbeleta gailurretara iritsiko gara. Egin tartetxoa eta gozatu begi-bistakoa Ikusgarria.
Ondoren Kurutzea dugu pare-parean. Hortik aurrera goitik behera doan bidezidorrari segi eta, Urkieta pasa ondoren, Lizarriturrira helduko gara. Egilehorrak, mahaiak, iturria, leku polita egonalditxo bat egiteko.
Txangoa iturriaren gaineko bidexkatik Neberara doa. Baso artetik irten gabe, baina paraje atsegina Nebera-alde hau ere. Hortxe dira lekuari izena ematen dioten elurzuloak. Hemen beherakoa, Santa Krutzeko bideari jarraituz berehala ezagutuko dugu Tortoarako bidegurutzean dagoen Txabolaldea. Utzi ezkerrekoa eta segi behera Añadiegiko bihurguneraino. Leku horretan gauza bera egin, utzi Beaingoa hurrengorako eta segi behera, laster izango dugu begi bistan Santa Krutz Hotela.

Errepidean sartutakoan ekin eskuin aldera, bertako etxe ondotik. Gero, Aikur Erle Museoa lehenengo, Ipenarrietako jauregia ondoren eta txangoaren helmuga amaieran, Aterpetxea.