Val glaciar de Prada. *Manzaneda (Maceda de Trives)

Ruta moi bonita polo val de orixe glaciar de Prada. O nome venlle da aldea hoxe deshabitada que está na cabeceira do val, no circo do antigo glaciar.
Comeza en San Miguel de Bidueira, a carón da impoñente igrexa barroca. Aquí hai un panel informativo. Está composta de dous bucles cunha breve parte común na aldea de Requeixo. Deste modo visítase tamén a aldea de Placín na volta. Estas tres aldeas son grandes e con boa construción, e aínda se ven algo poboadas.
O outro bucle faise subindo polo lado esquerdo do regato de Requeixo (a nosa dereita segundo subimos) e retórnase polo lado contrario. Non hai inconveniente e facelo ao revés mais así está ben.
No destino atopamos as ruínas de Prada, unha aldea de certa entidade composta por dous barrios. Algunhas construcións aínda conservan o teito pero con serio risco de caer dun día para outro. Unha tristura porque o entorno vese rico e fértil...
Nesta zona está as mellores mostras de glaciarismo de Galiza (xunto coas que caen en Vilariño de Conso). É un val de fondo chan e nos lados, en en varios puntos transversalmente, atopamos morenas laterais ou frontais. Nos paneis informativos chantados en varios puntos existe información sobre estes elementos do relevo, vexetación, antrópicos, etc.
O trazado descorre por camiños de carro que neste momento (aínda) está rozados. Algunhas partes son calzadas antigas. Nalgún punto, entre San Miguel e Requeixo, e tamén entre Placín e San Miguel, corre auga polas corredoiras (atención ao calzado, sobre todo en tempo de augada). Como se ve nos datos, o desnivel é moderado e non hai grandes subidas e baixadas. Hai algunhas zonas de sombra É unha ruta, polo tanto, acaída para persoas cunha mediana forma física e experiencia camiñando. Está sinalizada, incluso a variante ata Placín, porén o treito de Placín a San Miguel non o está e convén levar GPS (non ten moita perda tampouco).
En resumo unha ruta moi, moi recomendable.