Xistral 1: Transversal do Xistral

Traducción/Translation/Traduction: oajmer@gmail.com

Ruta que atravesa o Xistral desde O Campo, na parroquia de O Cadramón, ata O Viveirón (tamén chamado Viveiró), e sen pasar baixo ningún aeroxenerador!!!

A ruta empeza na estrada LU-0101 (de Abadín a Ferreira) xusto na ponte sobre o rego da Furna, afluente do río Ouro. Ao pé do cartel do LIC Río Ouro é o mellor sitio para aparcar. Continúase pola estrada uns 600 m ata o lugar de O Campo, onde está a capela de Santa Filomena e sube pola estrada da esquerda cara ao repetidor de TV. Uns 500 m despois, abandónase a estrada por un camiño á esquerda que baixará ata o val do rego da Furna.

Unha vez que se chega ao río haberá que cruzalo varias veces (non sempre é fácil) e pode ser un problema en función do caudal. Logo (03) cóllese por un val máis estreito e en subida entre Penas do Seixo e Coto da Lagoa por un camiño pedregoso entre acivros, carballos e outras árbores ata chegar á golada (06). A última parte da subida no track fíxose fóra de camiño, pero non é complicado xa que a vexetación é moi baixa. Na golada hai que atravesar un arame de espiños.

A baixada para a vertente do río Landro faise primeiro por un camiño sen perder altura e logo báixase (07) cara un piñeiral tamén sen camiño pero sen dificultade. Ao chegar abaixo hai que cruzar un regato e a continuación o rego dos Coruxos (08), afluente do Landro, algo máis ancho e onde se enlaza con outro camiño que xa nos levará ata a estrada LU-6502 e a O Viveirón (o nome que recibe na zona o lugar de Viveiró).

Ruta feita en decembro de 2011 por Patricia, Lilo, Jesús e Jose.