Zarautz, Indamendi basotik, Garate, Santa Barbara, Zarautz

Indamendira joan gara baina porlanezko bidetik igo ordez, basotik igo gara, errepidea baztertuaz. Bide luzeagoa izango da baina, tontorra egin bitartean basotik ibiliko gara. Horretarako, Abendaño industrigunetik hasi eta Sekaderora iristean, aurrera egingo dugu eskuineko errepidea hartu ordez. Ez dago markarik Indamendira iritsi bitartean. Bidea ere, tramu batzuetan ez dago oso garbia baina ikusten da. Askotan egin dugu. Beraz, Sekaderotik aurrera egin eta basoan sartuko gara. Errekaren ondotik joango gara hasieran baina une batean zeharkatu beharko dugu. Malda labur baina gogor xamarrak ditu batzuetan.
Borda batera iristean bide zabal bat topatuko dugu. Eskuinetara joanaz, Elkano auzora iritsiko gara. Guk ezkerretara hartuko dugu Indamendira igotzeko Elkanotik pasa gabe. Tramu honetan une batean bidea pixka bat galdu egiten da. Arroka batzuk ikusiko dira eta handik Elkanotik Urdaneta auzora doan bidera azalduko gara. Eskuinetara hartu eta Indamendira igotzeko bidea hartuko dugu berehala.
Indamendiko tontorra egin ondoren Miara (Meaga auzoa) joango gara. Mia igaro eta gero, frontoia (iturri bat dago) pasa eta gutxira, bidezidor bat hartuko dugu Garateko tontorrera iristeko.
Garatera iritsi ondoren kostaldeko paisaiaz goza dezakegu. Ezkerretara Getaria eta eskuinera Zarautz. Garateko gainetik eskuinera azaltzen den bidea hartuko dugu. Santa Barbara ermitara igotzeko bidegurutzera iritsiko gara. Aurrera egiten badugu, Zarautza iritsiko gara zuzenean, galtzadatik. Gu ordea, Santa Barbarako ermitara igoko gara eta ermita ondotik irekitzen bidea hartuaz, Zarauzko moilara joango gara. Moilara iritsi aurretik, Mutxioko (Montetxio) talaiara joango gara. Bertan, itsaso gainean gaudela irudituko zaigu.
Ondoren, Zarautza iritsiko gara.
Mendiaz eta itsasoaz gozatzeko bidea. Hasiera Azken Portu auzotik egin dugu, han aparkatzeko arazorik ez delako izango, baina herritik igarotzen da eta beraz, Salbide auzo ingurutik ere hasi daiteke.