19-OCT-14 Rutas BTT R-2 + PR-G 173 + R-3 (Meis y Ribadumia)

Centro BTT O Salnés: R2 y R3
R-2; Ruta dos Muíños de Armenteira + PR-G 173; Ruta do Río Umia + R-3; Ruta dos Outeiros de Silván.

R2 - Ruta dos Muíños de Armenteira
A ruta une os muíños de Barrantes (Ribadumia) co Mosteiro Cisterciense da Armenteira (Meis).
O trazado coincide en moitos tramos coa afamada senda peonil da Ruta da Pedra e da Auga, polo que os ciclistas deberán moderar a súa velocidade e ser precavidos cos transeúntes. Desde os muíños de Barrantes ascéndese nuns primeiros tramos de escasa dificultade a carón do río Armenteira ata pasar polos reconstruídos muíños do Serén e polo senlleiro conxunto escultórico da "Aldea Labrega" en Meis. O percorrido gaña altitude e dificultade no último tramo, separándose do complicado curso do río e achegándose á aldea de Silván. Logo, nun curto trazado por asfalto, a ruta retorna xunto ao río para chegar paseniño ata o Mosteiro.
Neste itinerario gozará de frondosas paisaxes fluviais e da rica arquitectura popular ao longo deste pequeno río. No final do trazado non hai que deixar de visitar o Mosteiro da Armenteira. A ruta serve de fío condutor para tirar o máximo partido desta rede xa que en Barrantes conecta coas rutas 6 e 9 e na Armenteira coas 3 e 5.

R3 - Ruta dos Outeiros de Silván
Arranca xunto ao río e o Mosteiro da Armenteira. A pesar da súa curta lonxitude, mostra un trazado levemente complicado no inicio e na fin.
Así zigzaguea paseniño entre as casas de Vilar, moitas de pedra e factura tradicional, ata internarse dentro do algo sinuoso bosque da Cova do Raposo. Pero ese pequeno esforzo paga a pena cando o ciclista chega aos Outeiros de Silván e, entre as árbores, ábrese un limpo horizonte de verdes vales e paisaxes agrarias e vitivinícolas, salpicadas de pequenas lombas con pechados bosques perennes. A maior parte do percorrido deste itinerario, tanto en dirección norte como no retorno cara ao sur, coincide coa ruta 10, permitindo o engarzamento con gran parte dos outros itinerarios.

Ruta do Río Umia [PR-G 173]
O río define o territorio e condiciona a vida das comunidades que viven nas súas marxes. No Salnés, máis que un elemento fronteirizo, o Umia convértese nun elemento de cohesión entre os concellos de Cambados, Ribadumia e Vilanova de Arousa, por onde transcorre o PR-G 173, Ruta do Río Umia.
O percorrido do sendeiro, de 5,5 quilómetros de lonxitude, está dominado por varias pontes tradicionais e modernas que actúan como puntos de unión de diferentes tramos. Malia que o trazado é lineal, posúe unha dificultade moi baixa, podendo facerse en ambos sentidos ou percorrelo de ida e volta. O itinerario parte da área recreativa de Santa Marta, en Ponte Arnelas (Leiro – Ribadumia). Despois de cruzar a pasarela do novo viaduto, continúase pola beira do río ata a ponte de Ponte Arnelas. Desde aquí, vólvese a Santa Marta e iníciase o segundo tramo cara a Cabanelas (Ribadumia) para rematar, co terceiro, en Barrantes (Ribadumia).
A importancia histórica e artística desta ruta ten o seu máximo expoñente na vila de Ponte Arnelas, coa súa “Ponte dos Padriños”, do século XVI, o muíño, a Capela de Santa Marta e as vivendas tradicionais, entre outros; así como a escultura contemporánea de Manolo Paz, no antigo campo da festa, que simboliza a unión dos tres concellos (Ribadumia, Vilanova de Arousa e Cambados).