Alegia-Gaintza: Tolosaldea eta Goierri arteko ikuslekuen bila.

Ibilbide Zirkularra: Alegia-Ikaztegieta-Ibiur-Azpizaletxe baserria-Abalizelaigoikoa baserria-Altzagarate-Altzagamendi-Gaintza-Ibiur-Lizarribar baserria-Zubeltzu baserria-Orendain (Jauregi baserria)-Larraspide etxaldea-Lugarraga-Galarreta-Alegia.

Alegiko Txintxarri plazan abiatuta Legorretako Ola auzoraino bidegorritik edo errepidetik joan behar da eta Baliarraingo bidetik jarraiki. Bi kilometro egin ondoren, Bidearte baserriaren parean, eskubitik gorantz jo behar da Azpizaletxe baserri aldera porlanezko bide batetik. Azpizaletxe baserrira iritsi eta segidan Errementarietxeberria baserritik pasatzen da. Langa bat zeharkatu behar da hemen (tornillo eta tuerka batekin lotutato katea dauka). Aurrera jarraitu eta pista aldapatsu batetik igo behar da, zeta pare bat eginez, baso lanak eragindako lepo moduko bateraino. Zakarra dago bide tarte motz batean (bizikletaren gainean ezina akaso) eta beste langa batera iristen da aurrerago segituta. Naiz eta arazorik gabe pasa bide honek landaretza pixka bat dauka tarteka, San Juan Iturriko bidera ailegatu arte. Eskubitik gorantz jo eta Abalizelaigoikoa baserriaren parean, eskubitik berriro, horiz eta zuriz balizatutako bidea hartu behar da Altzagarate aldera joateko. Erne ibili behar da "Bidegutze 4" waipointean, bapatean ezkerretik gora jo behar da. Aldapa behera jarraitu ezkero Legorretara jetsiko gera zuzenean. Altzagaratera iritsi baino lehenxoago ezkerretik gorantz jo non Burnisagasti baserriaren gurutzebidera iristen da. Gaintzako pista ezkerretik utzita ur biltegi batera iristen da eta jarraian Altzagamendiko mendibidea. Behin tontorra pasa ondoren, beste bide batetik Burnisagasti aldera jeisten da berriro, Altzagarate-Gaintza pistaraino. Gaintzara zuzentzen da bidea.

Gaintzako udaletxearen ondotik Irazusta baserrien bidea aukeratu behar da. Beherago bide hau eskubitik utzi eta Otatza baserrira (hondatuta dago) eta Ibiur urtegira jeisteko bidetik joan behar da. Gorako tarte bat edo bestea eduki arren zati honek jetsiera bihurria dauka; nahiko zabala eta biurgune askokoa, teknika pixka bat izan ezkero gozatzeko moduko tartea. Ibiur urtegiko goi partetik zeharkalditxo bat eginez segitzen da bidea. Aurrerago Lizarribar baserrira joateko bidea hartu behar da eskubitik gorantz. Aurreneko bihurgune pasa ondoren langa bat dago. Lizarribar baserriraino lurrezko bidea dago, belardi artean nahiko aldapatsua. Gero porlanezko aldapa bortitza izango da 400 m. inguru Anduti baserrira iritsi arte. Jarraian ere aldapa gogorra Abaltzisketa-Orendain errepideraino naiz eta desnibela pixka bat areagotu. Urtegitik errepideraino bi kilometro eskas daude bainan desnibela batazbesteko ehuneko 15a izango da gutxi gorabehera.

Orendainera errepidez eta porlanezko bide batetik urbiltzen da ibilbidea. Alegia-Orendain-Abaltzisketa bidegurutzera errepidez berriro eta zuzenean Larraspide etxaldera porlanezko bidea jarraituta. Larraspideko behi ikulluen atzetik bide landaretsu bat jarraitu behar da. Segidan, pinu artean dagoeneko, burnizko dorrea dago, ehiz parada dena. Landaretza dexente dago tarte honen hasiera baino zailtasun berezirik ez. Ur biltegi zar batearen ondotik pasatzen da gero eta beherago Lugarraga baserrira ailegatzen da. Gero Galarreta baserrira. Galarretatik berrehun metro beherago errepidea eskubitik behera utzi behar da. baso lanak zakartuta utzi dute hasiera; mendi bide zaharra da, desnibel haundikoa, Errotara jeisten zena. Orain Fabrensaren atzekaldean amaitzen da.

Naiz eta luzera haundikoa ez izan, ankei berotu ederra ematen zaie ibilbide hontan. Eta bere izenburua adierazten duen bezela, alderdi horietako panoramika ederrak ikusteko aukera dago bidearen zenbait puntuetatik. Bidegurutze asko izan arren ibilbidearen jarraipena erraza da. Hiru ordu inguruko txango "lasaia".