Goián - Esteiro do Miño - Vila Praia de Áncora

Ruta en bicicleta polo Esteiro e Desembocadura do Miño, na que gozaremos das dúas beiras do río (Galicia e Portugal) e nos achegaremos ata Vila Praia de Áncora, pasando por Vilanova da Cerveira e Caminha. Trátase dun percorrido circular, que aproveita a Ecopista do Minho e as pistas e sendeiros de pescadores da beira galega, totalmente chan e que conta co atractivo de cruzar o río Miño en barco de Caminha a Camposancos (A Guarda). Por este motivo, é indispensable á hora de preparar a ruta ter en conta os horarios das mareas e dos transbordadores, xa que varían dun día a outro (recoméndase consultalos na páxina web do concello da Guarda). É unha ruta para realizar en bicicleta de montaña ou gravel, xa que non se trata dun terreo técnico pero si conta cun firme irregular (de terra e algún treito de area).

CRÓNICA

O punto de inicio da nosa ruta é o embarcadoiro de Goián, xa que se trata dun espazo no que é moi sinxelo aparcar e que nos permite chegar ao descanso obrigado do traxecto en barco con boa parte do quilometraxe xa realizado (aínda así, ao tratarse dun percorrido circular, pode comezarse dende calquera outro punto que consideremos interesante para axustar os horarios das mareas e dos barcos).

Dende o embarcadoiro de Goián dirixirémonos río arriba, durante un curto treito, por unha pista perfectamente sinalizada que nos levará ata a ponte internacional de Goián – Vilanova da Cerveira, unha construción recente pola que cruzaremos a Portugal sen maior problema. Unha vez nos atopamos na beira portuguesa, enlazaremos coa Ecopista do Rio Minho para continuar en dirección contraria, cara o océano Atlántico. Deste xeito, avanzamos deixando a nosa dereita as illas da Boega e dos Amores, formadas polos sedimentos que arrastra o río, ata a freguesía de Lanhelas. Alí, a ecopista non ten un carril adicado senón que temos un treito de pouco máis de medio quilómetro compartido cos vehículos de motor.

Abandonamos a estrada para continuar tranquilamente pola ecopista ata Seixas, unha freguesía de Caminha onde volvemos a ter un traxecto máis longo pola N13. É unha mágoa que neste punto non exista un carril para bicicletas xa que os vehículos circulan a alta velocidade, pero a ponte que cruza o río Coura tampouco ten a suficiente amplitude.

Deste xeito chegamos á vila de Caminha*, onde pararemos á volta mentres agardamos polo transbordador, xa que agora continuaremos enganchados ao río con dirección á Foz do Minho: unha praia que entra no río e que se trata do punto máis próximo entre as dúas beiras no Estuario. Alí, cambiaremos a nosa dirección xa que abandonamos o curso do río, que desemboca no Atlántico, para seguir cara o sur pola costa de camiño a Vila Praia de Âncora.

En primeiro lugar, atravesaremos a Mata do Camarido, o maior piñeiral atlántico de Portugal, por un sendeiro de area onde podemos pedalear sen ningún problema para despois continuar enganchados ao mar unha vez deixamos atrás Moledo (o treito pola freguesía de Moledo, moi turístico, será o máis tedioso pola cantidade de coches e persoas que se moven por alí). Dende alí, tanto a ida como a volta, gozaremos dun percorrido cunhas vistas espectaculares ata que chegamos a Vila Praia de Âncora.

De volta a Caminha, faremos unha breve visita ao pobo mentres agardamos ao transbordador. O traxecto a bordo do barco, trátase dunha moi breve e cómoda singradura, cunhas vistas marabillosas sobre a desembocadura, o Forte da Ínsua e o Monte Trega. Dende o embarcadoiro de Camposancos, temos un primeiro treito ata Tamuxe onde combinaremos pistas e estradas con algo de tráfico, pero unha vez chegados a Tabagón regresaremos ás pistas e sendeiros máis tranquilos. Así, gozaremos dun tramo final ben bonito e apracible á beira do río.

*Aquí a ruta, en función do nivel e tempo de cada un, pode continuar directamente subindo ao transbordador e pechando a ruta pola beira galega. A ampliación ata Vila Praia de Âncora trátase dunha proposta que consideramos moi interesante polo que aporta a nivel paisaxístico.
---------------------------------------
Ruta realizada o 22 de agosto do 2022 sobre unha base de diPri OHío (https://es.wikiloc.com/wikiloc/user.do?id=147024)