Orientación en La Peñona

CARRERA ORIENTACIÓN LA PEÑONA (non oficial)

La carrera d’orientación de La Peñona (Somao, Pravia), con salida y llegada nel Área recreativa de La Peñona, constaba de 10 puntos de control y tenía establecía una clasificación de notes en función del tiempu total, onde 2 hores correspondíen a un 10 y cada 10’ baxaba un puntu, teniendo 3 hores pa sacar el 5.

La carrera facíase principalmente per pistes forestales nel monte Llaureiro, teniendo’l campu a través sólu como opción pa dir a dellos puntos pero nun siendo imprescindible más que brevemente pa ún de los puntos.

Planu de carrera colos puntos de control y planu col recorríu fechu.

El recorríu en total supuso facer unos 9 km y 300m de desnivel, nun tiempu nesti casu de 1h 20’.

Una vez vistu’l planu y agrupando mentalmente los distintos puntos en zones según la so distribución xeográfica y desnivel, trazo mentalmente la ruta, que corresponde col órden numéricu de los puntos.
Avanzo monte a través pa facer el control 1 y garrar la pista que me tien que llevar a L’Ordial, onde ta’l puntu 2. Ensin llegar, voi mirando hacia onde creo que debiera tar y consigo ver la baliza, polo qu’atayo pel monte y consigo recortar unos metros pa pinzar el 2. Dientro la mio estratexa, dau que nun puedo correr munchu nin munchu tiempu, prefiero facer un tramu más curtiu anque tenga que caminar, que correr per un terrenu más fácil pero más distancia.

Garro’l camín que me lleva a Santolaya de Riba, en cuya entrada ta el puntu de control 3, tico y garro rumbu Oeste descendiendo hasta cruzar la riega pa siguir ascendiendo rumbu Norte. El mapa ofrez una ruta hasta’l 4 que paez tener menos desnivel, pero va más apartada y a la entrada paez que la pista ta más zarrada, polo que decido siguir pela pista pela que diba. Enseguida llego a un cruce nel que tengo cerca’l puntu 5. Tendría que subir, ticar y volver a baxar pa siguir per equí al mio destín na 4. Si lu dexo pa depués tendría que baxar casi dende’l 6, ticar y volver. Observo’l mapa y decido facelo desta segunda manera porque’l desnivel a salvar va ser menor. Avanzo contra’l 4 y na parte más al Norte del circuitu, tícolu y vuelta p’arriba.

Nesta subida decido atayar per un monte taláu, pusto qu’asina puedo volver a caminar un cachu. Corro a ticar la 5 y subo pa la 6, descubriendo que ta fuera’l camín. Entós veo que toi más cerca de la 7 de lo que pensaba, polo que corro per esi prau mientres pienso en como atacar la 6. Marco’l control 7 y veo claru la trazada pa la 6, entro monte a través y la tico.

Nesti momentu preséntaseme una duda. El puntu 8 ta nuna pista más separada y más baxa de lo que toi, el camín natural sería retroceder rumbu Norte pa garrar esa pista, pero toi cansáu y decido entrar a buscala de frente rumbu Oeste. Esti tramu ye mui abegosu, ye una plantación d’ocalitos mui nuevos y los escayos engánchenme los pies en cuantu quiero trotar un pocu. Finalmente llego a la pista y tengo que buscar un sitiu per onde superar el desnivel de la desmonte de la pista. Creo que nun debí recortar tiempu, pero aforré de correr. Atopo la 8 y sigo el mesmu rumbu Sur. La pista apaez cortada yá nel borde’l mapa polo que miro’l mapa del móvil pa comprobar cuantu recorríu sería siguir la pista. Otra vez, decido atayar pel monte pa nun facer una ida y vuelta. Esta vez hai un gran desnivel y bastantes escayos, pero consigo mantener la llinia pa dar a la carretera y baxar al 9, intentando pisar pel borde acolcháu colos restos de pinu. Paso’l puntu de control 9 y la llínia al 10 ye clara, rectu p’arriba xuntu a l’alambrada del prau. Fáiseme duru pero m’alcuentro arriba antes de lo qu’esperaba, tico’l puntu 10 no altu de La Peñona y desciendo cansáu y satisfechu pal Área recreativa onde m’esperen los profesores y los dos compañeros que yá llegaron.