Paseo fluvial do río Maceda

O río Maceda ten o seu nacedorio no concello de Parada de Sil e no seu treito alto toma o nome de río de Niñodaguia, dado que pasa pola coñecida parroquia de artesáns alfareiros, do concello de Xunqueira de Espadanedo. Logo duns 5 Km e de recoller as augas de varios regachos, o seu nome troca polo de río de Maceda ou tamén río Sor e remata entregando as súas augas ao Arnoia no mesmo centro de Baños de Molgas.

Este río troiteiro, con gran número de muíños hidráulicos, é o protagonista dun doado paseo fluvial perfectamente acondicionado ao seu paso preto do núcleo urbano de Maceda. O sendeiro vai sempre polas beiras do río a sombra da acostumada arboreda de ribeira e na parte final permite un cambio a outra marxe.

Lese nun cartel que atopamos no paseo:

“Abeirados ao río Maceda, mesmo a carón do paseo fluvial, temos varios muíños hidráulicos (de regato), que estiveron operativos ata ben entrado o último tercio do século XX. Empregaban a forza da auga para obter enerxía. A súa función principal era a de moer cereais, nomeadamente centeo, millo e trigo para obter fariña. A súa orixe remóntase á Idade Media. Os muíños do río Maceda amosáronse fundamentais na economía tradicional da nosa contorna. Nun espazo reducido asentaron un bo feixe deles, o que reflicte gran actividade económica, social, de lecer e afectiva. No Catastro de Ensenada constan “doce rodas de muíños fariñeiros de pedras negreiras, que moen entre tres e catro fanegas de centeo ao ano cada un deles no río Maceda con abundante auga”. Os muíños de regato podían ter un só dono su ser de varios veciños (muíño de herdeiros), comunais con quendas de uso.”